Ստամբուլի Համալսարանի գիտաշխատող Մեհմեթ Փերինչեքը ծրագրել էր 2014-ի ապրիլի 22-ին Կայսերի (Կեսարիա) քաղաքի Էրջիյես համալսարանում կազմակերպել «Հայոց ցեղասպանությունը` իմպերիալիստական սուտ» խորագրով կոնֆերանս: Բայց ինչպես հայտնում է թուրքական «Օդա TV» լրատվականը, խնդրով զբաղվող համալսարանի համապատասխան հանձնաժողովը մերժվել է նման կոնֆերանսի անցկացումը:
Մերժման արժանացած Փերինչեքը դատապարտել է այդ որոշումը և Էրջիյես համալսարանի համար խիստ ամոթաբեր համարել: Ըստ նրա` ապրիլքսանչորսին ընդառաջ Թուրքիայի համար շատ կարևոր էր, որպեսզի Կայսերիում նման կոնֆերանս կազմակերպվի, ու բնակիչներին իրազեկվի «պատմական ճշմարտության» մասին:
Փերինչեքն այդ մերժումը համարել է քաղաքական հանգամանքներով պայմանավորված որոշում: Հեգնել է մերժման տակ ստորագրած համալսարանի դասախոսական կազմի ներկայացուցիչներին և ցածր գնահատել նրանց գիտական գործունեությունը:
Փերինչեքը դժկամորեն ընդգծել է այն հանգամանքը, որ «հայկական մամուլում Էրջիյես համալսարանի մասին դրական գնահատականներ են հնչում»: Թուրքական այդ համալսարանը հայկական մամուլում ներկայացվում է որպես հեղինակավոր բուհ:
«Հայկական մամուլը տոնական հրճվանքի մեջ էր, երբ ես կալանավորված էի, իսկ երբ ինձ ազատ արձակեցին, տխրել էր: Ինչն ուղղված է իմ դեմ, նրանք չափազանցնում և փայլուն ներկայացնում են»,- դժգոհել է Փերինչեքը:
Նշենք, որ տխրահռչակ Մեհմեթ Փերինչեքը Շվեյցարիայում Հայոց ցեղասպանությունը հերքելու համար դատապարտված, իսկ այնուհետև Եվրադատարանի կողմից արդարացված Թուրքիայի Բանվորական կուսակցության ղեկավար Դողու Փերինչեքի որդին է: Մեհմեթը մինչ ձերբակալվելը պետական կրթաթոշակով գործուղվել էր Մոսկվա և հետազոտում էր ռուսական արխիվները` փորձելով ցեղասպանությունը հերքով փաստեր հայտնաբերել: Նա հոր հետ միասին դատապարտվել էր «խորքային պետության» անդամ լինելու մեղադրանքով:
Leave a Reply