Էրդողանը Ցեղասպանության հարցը քննարկել է ԱՄՆ կոնգրեսի ներկայացուցիչների պալատի նախագահի հետ

Թուրքիայի վարչապետ Ռեջեփ Թայիփ Էրդողանը ընդունել է Թուրքիա այցելած Ամերիկայի Միացյալ Նահանգների (ԱՄՆ) կոնգրեսի ներկայացուցիչների պալատի նախագահ Ջոն Բեյներին և նրան ուղեկցող պատվիրակությանը:

Հանդիպման ընթացքում քննարկվել են միջազգային օրակարգային հարցեր՝ սիրիական հարցը և ուկրաինական ճգնաժամը:

Վարչապետ Էրդողանն անդրադարձել է նաև Հայոց ցեղասպանության թեմային՝ նշելով, որ չպետք է թույլ տալ, որպեսզի այդ հարցը բացասաբար ազդի երկկողմ հարաբերությունների վրա:

Ըստ թուրքական «Բեյազգյունդեմ» լրատվական կայքի` Ջոն Բեյները  հայտնել է, որ հարցը պետք է թողնել պատմաբաններին:

Հիշեցնենք, որ ԱՄՆ կոնգրեսի ներկայացուցիչների պալատի նախագահ Ջոն Բեյները հանդիպել է նաև Թուրքիայի ազգային մեծ ժողովի նախագահ Ջեմիլ Չիչեքի հետ: Վերջինս ուշադրություն է հրավիրել ԱՄՆ սենատի արտաքին հարաբերությունների հանձնաժողովի կողմից ապրիլի 10-ին Հայոց ցեղասպանության մասին բանաձևի ընդունման վրա:  Չիչեքն ընդգծել է, որ խորհրդարանները պետք է ներկան ու ապագան կերտեն, իսկ պատմությունը պետք է թողնել պատմաբաններին:

http://ermenihaber.am/?lang_id=2&menyu_id=3&top_current=168