Հայոց ցեղասպանութեան հարյուրամյա տարելիցին ընդառաջ Թուրքիայում հրատարակվել է գիրք, որը վերաբերում է Ցեղասպանութեան հիսուներորդ տարելիցին, տեղեկացնում է Lurer.com-ը` մեջբերելով «Ակօս» պարբերականը:
«1965» խորագիրը կրող գրքի հեղինակերն են լրագրողներ Սերդար Քորուջուն և Արիս Նալջըն: Գիրքը ներկայացնում է Հայոց ցեղասպանության 50-րդ տարելիցին աշխարհի տարբեր կետերում տեղի ունեցած հիշատակի արարողությունները և դրանց արտացոլումը թուրքական լրատվամիջոցներում:
Գրքի հեղինակները ներկայացրել են 1965 թ. ապրիլի 24-ին տեղի ունեցած իրադարձությունները, դրանց վերաբերյալ արձանագրված միջազգային արձագանքները և համաշխարհային հանրության արձագանքը: Հայկական մշակութային հրատարակչության կողմից լույս տեսած գիրքը 1965 թ. Թուրքիայում հրատարակված թերթերի ու ամսագրերի կատարած անդրադարձերի ժողովածու է:
Խոսելով գիրքը ստեղծելու շարժառիթների մասին’ հեղինակներից Սերդար Քորուջուն նշում է. «Հայոց ցեղասպանութեան 100-րդ տարելիցին շատ քիչ ժամանակ է մնացել, սակայն այս իրադարձութեան 50-րդ տարելիցն էլ եղել: 1965 թվականը Հայոց ցեղասպանության զանգվածային հիշատակման ժամանակ էր: Հատելով իրադարձության 100-րդ տարին’ Անկարան անհանգիստ է, մեդիան չգիտի’ ինչ դիրքորոշում բռնել: Անհանգստություն կա, թե քանի երկիր այն կճանաչի, ԱՄՆ-ից ապտակ կգա, թե ոչ»: Թուրք լրագրողն ընդգծում է, որ անգամ հիսուն տարի անց Հայոց ցեղասպանության խնդրի վերաբերյալ թուրքական լրատվամիջոցների արձագանքը գրեթէ մնացել է նույնը:
Գրքի մյուս հեղինակ Արիս Նալջըն, ներկայացնելով ձախակողմյան լրատվամիջոցների դիրքորոշումը, ընդգծում է, որ դրանցում հայերը մեծապես ներկայացված են որպես իմպերիալիստների ձեռքի խաղալիք’ սկզբում Ռուսաստանի, ապա արդեն ԱՄՆ-ի:
«1965» գրքում տեղ են գտել թուրքական «Աքշամ», «Ջումհուրիեթ», «Դունյա», «Հաբեր», «Հյուրիեթ», «Միլլիեթ», «Ուլուս», «Թերջյուման», «Յենի Իսթանբուլ», «Յենի գազեթե» և «Զաֆեր» թերթերի, ինչպես նաև այդ տարիներին հրատարակվող հայկական «Ժամանակ» ու «Մարմարա» պարբերականների հոդվածները:
Leave a Reply