Ստամբուլի միջազգային գիտաժողովում քննարկվեց Հայոց ցեղասպանության հարցը

Ապրիլի 8-12 Ստամբուլի Բիլգի համալսարանում կայացավ միջազգային գիտաժողով («Ամեն ինչ չէ, որ խաղաղ է օսմանյան ռազմաճակատում. Հեռանկարներ համաշխարհային պատերազմի (1914-1918) վերաբերյալ, որոնք անուշադրության են մատնվել (Not All Quiet on the Ottoman Fronts: Neglected Perspectives on a Global War, 1914-18)»)՝ նվիրված Առաջին համաշխարրհային պատերազմի 100 ամյակին: Այն կազմակերպել էին Պատմության հիմնադրամն (Tarih Vakf) ու Ստամբուլի Օրիենտ ինստիտուտը (Orient-Institut Istanbul), աջակցում էին Բողազիչի, Սաբանջը, Ստամբուլի Բիլգի, Շեհիր համալսարաններն ու Անատոլիական ուսումնասիրությունների Ֆրանսիական ինստիտուտը: Տեղի ունեցան 20-ից ավելի նիստեր, որոնց ընթացքում ներկայացվեին ավելի քան 70 զեկույցներ: Մասնակցում էին վաստակաշատ և հայտնի գիտնականներ տարբեր համալսարաններից՝ Բենջամին Ֆորթնա, Հանս Լուկաս Քիզեր, Ջեյ Վինթեր, Վոլֆգանգ Գյուստ, Հեղնար Ուաթենփոն, Մեթե Թունջայ, Ռոլանդ Սյունի, Մարգարեթ Անդերսոն, Թաներ Աքչամ, Մուսթաֆա Աքսաքալ և այլք:

Գիտաժողովը կենտրոնացավ երեք հիմնական թեմայի վրա՝ վերապրել պատերազմ, կազմակերպել պատերազմ և խոսել պատերազմի մասին:

Նիստերից մեկը, որ ղեկավարում էր Քլարք համալսարանի Հայոց ցեղասպանության ուսումնասիրությունների ամբիոնի վարիչ դոկտ. Թաներ Աքչամը, նիրված էր Առաջին համաշխարհային պատերազմի ժամանակ տեղի ունեցած Հայոց ցեղասպանությանը: Բանախոսները քննարկեցին ռազմաճակատներում տեղի ունեցած էթնիկ զտումների ու Հայոց ցեղասպանության, Գերմանիայի ազդեցության և գաղութատիրական քաղաքականության վերաբերյալհարցերը:

Գիտաժողովն անցավ բավականին բուռն քննարկումների մթնոլորտում, ներկայացվեցին Աշխարհամատի վերաբերյալ նոր աղբյուրներ, թեզեր ու անուշադրության մատնված հեռանկարներ:

 Անահիտ Քարտաշյան, Ստամբուլից