Քեսաբի վրա հարձակումը Թուրքիայի ցեղասպանության քաղաքականության շարունակությունն է. Ռուբեն Սաֆրաստյան

Քեսաբի վրա հարձակումը Թուրքիայի կողմից ցեղասպանության քաղաքականության շարունակությունն է: Երևան–Մոսկվա տեսակամուրջի ընթացքում այսպիսի կարծիք հայտնեց ՀՀ ԳԱԱ արևելագիտութան ինստիտուտի տնօրեն Ռուբեն Սաֆրաստյանը: «Մենք այս պահին ականատես ենք լինում Մերձավոր Արևելքը հայաթափելու քաղաքականությանը, որն իրականացվում է Թուրքիայի կողմից»,- «Արմենպրես»-ի հաղորդմամբ, նշեց Սաֆրաստյանը:

Սաֆրաստյանը հիշեցրեց, որ դեռևս 1930-ականներին Քեսաբը մտել է Թուրքիայի տարածքի մեջ, սակայն հետգայում Քեսաբի բնակչության ձայնը լսելի է դարձել միջազգային օղակներում, ինչի արդյունքում Քեսաբը Սիրիայի տարածք է դարձել: «Հիմա Թուրքիան քայլեր է ձեռնարկում Քեսաբին տիրանալու համար»,- նշեց Սաֆրաստյանը:

Նրա խոսքով, էթնիկ զտումների փորձերը, որ տեղի են ունենում Սիրիայում, խոսում են այն մասին, որ Թուրքիան կարող է տարածքային ագրեսիա դրսևորել Սիրիայի նկատմամբ: «Ես կարծում եմ, որ Քեսաբի վրա հարձակումն առաջին քայլն է»,- ասաց նա:

Թուրք-սիրիական սահմանի մերձակայքում և Լաթաքիայի հյուսիսում գտնվող Քեսաբ գյուղաքաղաքի վրա հարձակումն սկսվել է մարտի 21-ին Թուրքիայի սահմանի ութ կետերից: Տեղեկություններ են հաղորդվել, որ հարձակումն իրականացրել են Ջաբհա ալ Նուսրա և Ջեյշալ Իսլամ խմբավորումները: Գյուղաքաղաքում գրեթե բնակիչներ չեն մնացել, նրանք տեղափոխվել են առավել ապահով վայրեր: Հայերի մեծամասնությունը ապաստան է գտել Լաթաքիայի Սուրբ Աստվածածին եկեղեցու տարածքի մոտ գտնվող ազգային կառույցներում:

Տեղի Հայկական շտապ օգնության մարմինը Սիրիայի Կարմիր մահիկի կազմակերպության հետ բնակիչներին ապահովել է անհրաժեշտ պարագաներով և սննդով: Քեսաբում մնացած փոքրաթիվ հայերի ճակատագրի վերաբերյալ լուրերը հակասական են: Իրադարձությունների վրա աշխարհի ուշադրությունն է հրավիրել ՀՀ նախագահ Սերժ Սարգսյանը Հաագայում` Միջուկային անվտանգության միջազգային գագաթնաժողովի ժամանակ ելույթ ունենալով մամուլի համար: Հայ պատգամավորների խումբն էլ այցելել էր Սիրիա’ տեղում ծանոթանալու մեր հայրենակիցների ճակատագրին: Նրանց ընդունել է Սիրիայի նախագահ Բաշար ալ Ասադը:

Աղբյուր՝ Times.am