Մուրադ Նազարյանը հոգեպես առողջ է և կարող է պատասխանատվություն կրել Սամաթիայում հայ կնոջ սպանության համար

Ստամբուլի Սամաթիա թաղամասում ազգությամբ հայ Թուրքիայի քաղաքացի Մարիցա Քյուչուքի սպանության կասկածանքով ձերբակալված Մուրադ Նազարյանը, համաձայն դատական փորձաքննության արդյունքների, հոգեկան խնդիրներ չունի և կարող է պատասխանատվություն կրել իր քայլերի համար։

Ինչպես տեղեկացնում է թուրքական Sondakika կայքը, Մուրադ Նազարյանը մասնակցել է Ստամբուլի ծանր հանցագործությունների 2-րդ դատարանում կայացած հերթական նիստին, իսկ Քյուչուքի ընտանիքը ներկայացրել է փաստաբան Էրեն Քեսքինը։

Դատարանը Մուրադ Նազարյանից հետաքրքրվել է, թե նախկինում հոգեկան խնդիրների պատճառով բուժում ստացե՞լ է, ինչին ի պատասխան Նազարյանը նշել է, որ 2010թ. Բաքըրքյոյի բժիշկներից մեկն իրեն դեղ է նշանակել, ինչը, սակայն, չի խմել և այլևս բժշկի չի դիմել։

Նա նշել է, որ դրանից հետո իր հոգեկան խնդիրները շարունակվել են, բայց թե ինչ բժշկի մոտ է գնացել և ինչ դեղ է օգտագործել, չի հիշում։

Սպանության օրվա մասին պատմելիս Մուրադ Նազարյանը նշել է, որ մարդիկ, ում նախկինում չի տեսել և չի ճանաչել, իրեն նստեցրել են մեքենան և դեղ են տվել։ «Այդ մարդկանց առաջ չէի տեսել, բայց նրանք ինձ անունով դիմեցին, և ես կարծեցի, թե ոստիկաններ են և նստեցի մեքենան։ Ինձ դեղ տվեցին, ինչից հետո ուշաթափվեցի։ Միայն հիշում եմ, որ մատիցս արյուն վերցրին»,- պատմել է նա։

Ստամբուլի գլխավոր դատախազության ներկայացրած մեղադրական եզրակացության մեջ նշվում է, որ կասկածյալ Նազարյանը «դաժանաբար և չարչարելով կանխամտածված սպանություն է իրականացրել», և նրան ցմահ ազատազրկելու պահանջ է ներկայացվել։

Ստամբուլի Շիշլի և Ֆաթիհ թաղամասերում անցյալ տարի միայնակ ապրող 4 տարեց կանայք հարձակման էին ենթարկվել, որոնցից 85-ամյա Մարիցա Քյուչուքը մահացել էր։ Դեպքերից հետո ձերբակալվել էր ազգությամբ հայ Մուրադ Նազարյանը, ում հոգեկան առողջության մասին բազմաթիվ մտահոգություններ էին հնչել։

http://www.tert.am/am/news/2014/04/09/samatya-murat-nazaryan/