Հաթայցի հայերը համառորեն պնդում են, որ Վաքըֆլըն պահպանի «գյուղ» անվանումը

Երբ Հաթայ քաղաքը մետրոպոլի կարգավիճակ ստացավ, Վաքըֆլը գյուղն էլ դարձավ թաղամաս, սակայն գյուղում ապրող հայ քաղաքացիները ցանկանում են, որ իրենց գյուղը կոչվի «Վաքըֆլը գյուղ թաղամաս»:

Սամանդաղ գավառում 35 տուն և 135 հոգի բնակչություն ունեցող Վաքըֆլըում բնակվող քաղաքացիները պահանջում են, որ այսուհետ Վաքըֆլը թաղամասի փոխարեն կոչեն «Վաքըֆլը գյուղ թաղամաս»:

21 տարի շարունակ Վաքըֆլըի գյուղապետ Պերճ Քարթունը (53) Անադոլու լրատվական գործակալության լրագրողի հետ զրույցում նշել է, որ Թուրքիայում շատ չեն գյուղեր, որտեղ հայ քաղաքացիներ են բնակվում. իրենց թե՛ արտերկրում, և թե՛ երկրում ճանաչում են որպես Վաքըֆլը գյուղ:  

Քարթունը նշելով, որ երբ Հաթայ քաղաքը մետրոպոլի կարգավիճակ ստացավ, Վաքըֆլը գյուղն էլ դարձավ թաղամաս, ասաց. «Կարծում եմ` իմ պաշտոնավարության ընթացքում գյուղիս համար բավականին բան եմ կատարել: Այս ժամանակամիջոցի համար շնորհակալ եմ մեր պետությանն ու կառավարությանը: Ինչ էլ որ ասել եմ` «ոչ» չեն ասել: Ծառայության ժամանակ երբեք իմ նկատմամբ վատ չեն վերաբերվել: Որևէ թերություն չի մնացել: Նախկինում որպես գյուղ էին մեզ ճանաչում, և մեզ շատ է տխրեցնում, որ մենք գյուղի կարգավիճակ այլևս չունենք: Ցանկանում ենք գոնե «Վաքըֆլը գյուղ թաղամաս» կոչվել: Նախաձեռնությամբ ենք հանդես եկել, որպեսզի մեր գյուղի անունը չփոխեն: Տա Աստված` մեր վերադասները ականջ դնեն մեր պահանջին»:

Քարթունը հայտնեց, որ երբ գյուղի գյուղապետի թեկնածություն առաջադրեց, գյուղացիները ցանկացան, որ առնվազն 25 տարի գյուղապետ լինի, և արդեն 5-րդ անգամ է, որ որպես միակ թեկնածու հպարտությամբ պաշտոնավարում է:

Քարթունը նշեց, որ Վաքըֆլըում տարեց բնակչություն է մնացել, երիտասարդներն աշխատանք գտնելու համար ստիպված են տեղափոխվել մեծ քաղաքներ. «2004 թ. հիմնեցինք Վաքըֆլը գյուղի գյուղատնտեսության զարգացման կոոպերատիվը: Հիմնադրամի և գանձարանի տարածքներ վարձակալեցինք՝ նպատակ ունենալով մեր կոոպերատիվը ընդլայնելով` համալսարանում սովորող մեր երիտասարդներին այստեղ պահել, սակայն, ցավոք, չստացվեց: Մեր բերքը գումար չբերեց, մեր ծախսերը չհանեցինք անգամ: Եթե մեր երիտասարդների համար աշխատանքի հնարավորություն չստեղծենք, ապա շատ դժվար կլինի, որ նրանք այստեղ մնան: Նման իրավիճակում մեր թաղամասն էլ ժամանակի ընթացքում կարող է ոչնչանալ»:

Քարթունը հավելեց, որ իրենք Հաթայի խճանկարի մի հատվածն են և այսուհետ էլ շարունակվելու է այդպես լինել:

Թաղամասի բնակիչների պահանջը

Վաքըֆլըի բնակիչներից Փանոս Չափարը (82) նշեց, որ ցանկանում է, որ այն վայրը, որտեղ ծնվել-մեծացել է, շարունակվի կոչվել Վաքըֆլը գյուղ:

Չափարը նաև հավելեց, որ Ստամբուլում բազմաթիվ թաղամասեր կան գյուղ անվան բաղադրիչով՝ Յեշիլգյուղ, Բաքըրգյուղ, Քադըգյուղ, իրենք էլ են ցանկանում, որ վայրը, որտեղ ապրում են, գյուղ անվամբ հիշատակվի:

Իսկ Բաբկեն Սիլահլըն (75 ) ասաց, որ վայրը, որտեղ իրենք ապրում են, աշխարհում գրեթե նմանը չունի, և գյուղի անվանումը պահպանելու համար սպասում են իրավասուների աջակցությանը:

http://haberciniz.biz/hatayli-ermeniler-koy-isminde-israrli-2758409h.htm

Թարգմանեց Անահիտ Քարտաշյանը