Կոնգրեսականները կոչ են արել ԱՄՆ-ի կառավարությանը` օգնություն տրամադրել Քեսաբից տեղահանվածներին

ԱՄՆ-ի Կոնգրեսի անդամ Ադամ Շիֆի գլխավորությամբ տեղի է ունեցել կոնգրեսականների մամուլի ասուլիս, որի շրջանակներում քննադատվել է Սիրիայի հայաբնակ Քեսաբ ավանի բնակչության բռնի տեղահանությունը, որի կազմակերպիչներն են Թուրքիայի աջակցությունն ունեցող ահաբեկիչները։

Ինչպես հայտնում է ԱՄՆ-ի Հայ դատի գրասենյակը (ANCA), բացի Շիֆից միջոցառմանը ներկա են եղել հայամետ կոնգրեսականներ Ֆրենկ Փալոնեն, Բրեդ Շերմանը, Ջուդի Չուն, Ջիմ Կոստան, Աննա Էշուն, ինչպես նաև ANCA-ի գործադիր տնօրեն Արամ Համբարյանը։

Մամուլի ասուլիսի մասնակիցները կոչ են արել ԱՄՆ-ի կառավարությանն ավելացնել տեղահանվածներին տրամադրվող օգնությունը, ինչպես նաև հետաքննել Թուրքիայի ունեցած դերակատարումը Քեսաբի վրա հարձակման գործում։

Շիֆը հավելել է, որ սիրիական հակամարտություն սկզբից մշտապես բարձրացրել է սիրիահայերի պաշտպանության հարցն ու այդ թեմայով անձամբ զրուցել է նախագահ Բարաք Օբամայի հետ։

Համբարյանը շնորհակալություն է հայտնել մամուլի ասուլիսին մասնակցած բոլոր կոնգրեսականներին՝ ընդգծելով, որ Քեսաբի վրա հարձակումներն իրականացվել են Թուրքիայի զինուժի ակնհայտ աջակցությամբ։

http://www.tert.am/am/news/2014/04/09/kessab-crisis/