Թուրքիայի արտաքին գործերի նախարարությունը պաշտոնական հայտարարություն է տարածել, որում նշել է, թե Քեսաբի հարցի վերաբերյալ հանդիպումներ են են անցկացրել Պոլսո պատրիարքարանի և Թուրքիայի հայ համայնքի ներկայացուցիչների հետ։ Հայտարարությունում ասված է, թե Թուրքիան պատրաստ է օգնել Սիրիայում ստեղծված իրավիճակից տուժած բոլոր մարդկանց՝ անկախ նրանց կրոնից ու ազգությունից։ Ըստ թուրքական ԱԳՆ-ի՝ Քեսաբի հայերին օգնելու համար էլ իրենք խորհրդակցություններ են անցկացրել Պոլսո հայոց պատրիարքարանի հոգևոր առաջնորդների, ինչպես նաև Թուրքիայի հայ համայնքի ներկայացուցիչների հետ։
Նշենք, որ վերջին շրջանում թուրքական լրատվամիջոցներն ակտիվորեն տարածում են Քեսաբում մնացած տարեց հայերին Թուրքիա տեղափոխելու մասին լուրերն ու լուսանկարները։ Նշվում է, թե «իրենց կամքով» Թուրքիա տեղափոխված հայերին ապահովել են անհրաժեշտ իրերով ու կացարանով։
Թուրքիան փորձում է այս կերպ մեղմել իր դեմ բարձրացած բողոքի ալիքը, ինչը կապված է պաշտոնական Անկարայի՝ Քեսաբի վրա հարձակված զինյալներին ակտիվ աջակցելու հետ։ Հարձակման հետևանքով քեսաբահայերը ստիպված լքել են իրենց տները և ապաստան գտել սիրիական Լաթաքիա քաղաքում։ Քեսաբում մնացել են տարեց հայեր, որոնց էլ այժմ փորձում է օգտագործել թուրքական քարոզչությունը։
AllTurkey.am
Leave a Reply