«Ակօս» պարբերականի աշխատակից. Քեսաբահայերին խաբեությամբ են Թուրքիա տեղափոխել

19 տարեց քեսաբահայերի` Սիրիայից Թուրքիա են տեղափոխել խաբեության միջոցով: Այս մասին NEWS.am–ի թղթակցի հետ զրույցում հայտարարել է Ստամբուլի «Ակօս» հայկական պարբերականի լրագրող Բագրատ Էստուկյանը` ընդգծելով, որ ահաբեկիչները, որոնք գրավել են Քեսաբը, պարզապես խաբել են անօգնական տարեցներին ու տեղափոխել նրանց Թուրքիայի միակ հայաբնակ գյուղ՝ Վաքըֆլը:

«Զինյալները պարզապես խաբել են տարեցներին, հայտարարելով, որ նրանց տանում են Լաթաքիա՝ փոխարենը Թուրքիա տանելով: Վաքըֆի բնակիչներն ապաստանել են ծերունիներին: Չնայած որ 120 բնակիչ ունեցող գյուղում տեղը քիչ է, սակայն տեղաբնակների խոսքով՝ 19 մարդու ապաստան տալ իրենք կարող են»,-ընդգծել է Էստուկյանը:

Ըստ նրա՝ այդ կապակցությամբ Ստամբուլի հայկական համայնքում միջոցներ են հավաքել, որպեսզի օգնեն տարեցներին: Նա նաեւ ընդգծել է, որ քեսաբահայերը հետ՝ Սիրիա,  վերադառնալու ցանկություն են հայտնել, մասնավորապես՝ Լաթաքիա, սակայն նկատի ունենալով ռազմական գործողությունները` դա առայժմ հնարավոր չէ. «Նրանց, իհարկե, այժմ վտանգ չի սպառնում, սակայն նրանք անհարմարություն են զգում, քանի որ հեռացել են հարազատներից ու ծանոթներից»:

Հիշեցնենք, որ սիրիահայերով բնակեցված սիրիական Քեսաբ ավանը հարձակման էր ենթարկվել Թուրքիայի տարածքից ներխուժած իսլամիստ ծայրահեղականների կողմից:

http://news.am/arm/news/203157.html