Թեհրանում կայացավ համահավաք`ի զորակցություն քեսաբահայության

ՍԻՐԵԼԻ’ ՔԵՍԱԲԱՀԱՅԵՐ, ՁԵԶ ՀԵՏ Է ՀԱՄԱՅՆ ԻՐԱՆԱՀԱՅՈՒԹՈՒՆԸ ԵՎ ՊԱՏՐԱՍՏ ԱՄԵՆ ՔԱՅԼԻ` ՁԵՐ ԻՐԱՎՈՒՆՔՆԵՐԸ ՎԵՐԱԿԱՆԳՆԵԼՈՒ ՀԱՄԱՐ:

Երէկ երեկոյան ժամը 7-ին Թեհրանի Սասուն քաղաքամասի Սուրբ Թարգմանչաց եկեղեցու շրջափակում տեղի ունեցավ համահավաք` ի պաշտպանութիւն Սիրիայում գտնվող հայաբնակ Քեսաբ քաղաքի հայության` քեսաբահայության:

Համահավաքը տեղի ունեցավ Թեհրանի հայոց թեմի հովանավորությամբ, որտեղ մասնակից էին և իրենց զորակցությունն էին բերել թեմի յուրաքանչյուր միություն, հասարակական մարմին և միավոր: Նշենք նաև, որ միջոցառումները՝ նվիրված քեսաբահայության, շարունակական են լինելու, քանի դեռ կա ցեղասպանության շարունակականության հարցն ու խնդիրը:

Ի պաշտպանութիւն քեսաբահայության՝ ելույթով հանդես եկավ Իրանի Իսլամական խորհրդարանում հյուսիսային իրանահայության պատգամաւոր դոկտ. Կարեն Խանլարյանը, ընթերցվեց Թեհրանի հայոց թեմի առաջնորդ Տ. Սեպուհ արքեպիսկոպոս Սարգսյանի պատգամը, որն այս օրերին աշխատանքային այցով Սիրիայում է գտնվում, պատգամում մասնավորապես ասվում է. «Այսօր ամբողջ հայությունը մի մարդու նման ոտքի է կանգնած և փորձում է օգնության հասնել սիրիահայությանը և հասնում է ու մյուս կողմից էլ ավելի հաստատակամ ու վճռորոշ կառչած է մնում իր հոգևոր ու ազգային արժեքներին և գործում ու պայքարում է` միշտ տեսիլքով իր ամբողջական հայրենիքի ու ժողովրդի:

Մենք այս առիթով ողջունում ենք մեր ծննդավայր հայրենիքի` Իրանի Իսլամական Հանրապետութեան խոհուն, իմաստուն և ժողովրդամետ քաղաքականությունը՝ Միջին Արևելքի և հատկապես Սիրիայի տագնապին հարաբերաբար:

Հավատանք ու հավատքով գործենք ու շարունակենք մեկ ազգ, մեկ ժողովուրդ, մեկ եկեղեցի ու հայրենիք տեսլականով ու վստահ եղեք, որ մի օր հասնելու ենք մեր երազին ու տեսիլքին» մեջբերման ավարտը:

Արտահայտվեցին նաեւ Կազմակերպիչ հանձնախմբի կողմից ներկայացուցիչներ, որոնց խոսքը, բնականորեն, ուղղված էր ի պաշտպանություն քեսաբահայերի անվտանգության: Ցուցադրվեցին նաեւ քեսաբահայության կացության մասին պատմող տեսասահիկներ:

Իրանահայ համայնքը նաեւ բողոքի գրություն է հղել Իրանում դիվանագիտական օտարերկրյա ներկայացուցչություններին՝ դեսպանատներին, ի մասնավորի Եվրոպական միության անդամ երկրների՝ Ռուսաստանի Դաշնության, Չինաստանի, Ճապոնիայի, Հնդկաստանի, Կանադայի դեսպանատներին, ինչպես նաև Իրանում ՄԱԿ-ի ներկայացուցչությանը: Հղված գրության մեջ նկարագրելով Քեսաբի վերջին դեպքերը՝ ներկայացվել են այդ կապակցությամբ հայության պահանջները:

Նամակում մասնավորապես նշված է. «Համաշխարհային հանրությունը պետք է երաշխավորի, որ վերջ կդրվի բռնությանը և քաղաքացիների ու փոքրամասնությունների իրավունքների ոտնահարմանը և որ Թուրքիան կպատժվի ու կնախազգուշացվի ահաբեկչական խմբերի հետ շարունակական համագործակցության համար:

Մենք դատապարտում ենք ահաբեկիչներին տրվող որևէ օգնություն եւ մարդու իրաւունքների պաշտպանի անունից հանդես եկողների երեսպաշտությունը»:

Համահավաքին ներկա էին՝ Իրանում Հայաստանի Հանրապետութեան արտակարգ և լիազոր դեսպան Գրիգոր Առաքելյանը, ՀՀ հյուպատոսը և խորհրդականը, ԻԻՀ Խորհրդարանում հյուսիսային իրանահայության պատգամավոր դոկտ. Կարեն Խանլարյանը, Թեհրանի թեմի օրենսդիր և  գործադիր մարմինների ներկայացուցիչներ ինչպես նաև «Ալիք» հաստատության և «Ալիք» օրաթերթի ներկայացուցիչներ ու հոծ թեհրանահայություն:

Ankakh.com