Ստամբուլի Ջերրահփաշա թաղամասում թաղապետի թեկնածու` ազգությամբ հայ Ժակլին Քուրթի թեկնածությունը փորձել են գաղտնի պահել ընտրողներից, տեղեկացնում է «Բիրգյուն» թուրքական կայքը:
Տեղական ինքնակառավարման մարմինների ընտրությունների օրը՝ մարտի 30-ին, տեղամաս այցելած ընտրողները հարցրել են, թե ինչու քվեաթերթիկում չկա Քուրթի անունը, ինչին ընտրական հանձնաժողովի անդամները պատասխանել են, թե նման թեկնածու չկա գրանցված։
Թաղամասի բնակիչներից Ֆիլոր Ուլուքն ահազանգել է այդ մասին, ինչից հետո թաղամաս մեկնած լրագրողը պարզել է, որ շատ ընտրողներ կարծել են, թե Քուրթը դուրս է եկել ընտրապայքարից։
Ուլուքն էլ նշել է, որ երբ հարցրել է Քուրթի մասին, պատասխանատուներն ասել են, որ նման թեկնածու չկա, միայն երկու թեկնածու է գրանցված:
«Որպես հայ քաղաքացի՝ Սամաթիայում հայերի դեմ իրականացված հարձակումներից հետո հայ կնոջ՝ քաղաքականություն նետվելու մասին անգամ երազել չէի կարող։ Այդ պատճառով, երբ իմացա, որ Ջակլին Քուրթը թեկնածություն է դրել, շատ ուրախացա։ Բայց պարզվեց, որ երբ խոսքը հայերի վրա հարձակվելուն է վերաբերում, ցուցակներ են կազմվում, իսկ ընտրության դեպքում՝ ցուցակում գտիր, թե կարող ես»,- ասել է նա։
Հայ թեկնածուն տեղի ունեցածն անհանդուրժողականության դրսևորում է որակել։ Նա պատրաստվում է դատի տալ հանձնաժողովի անդամներին։
Հիշեցնենք, որ 2012թ. դեկտեմբերի 28-ից 2013-ի հունվարի 26-ն ընկած ժամանակահատվածում հայ կանանց դեմ իրար նման հարձակումներ էին տեղի ունեցել, որոնք կատարելու կասկածանքով էլ ոստիկանությունը ձերբակալել էր ազգությամբ հայ Մուրադ Նազարյանին։ Սակայն պնդումներ կան, որ նա միայնակ չի գործել։
Leave a Reply