Թուրքիայում քաղաքապետի թեկնածու է սպանվել

Թուրքիայի Սղերթ նահանգի (Սիիրթ) Թիլլո քաղաքապետի թեկնածուն սպանվել է սեփական տան առաջ։

Ինչպես հայտնում է թուրքական «Անադոլու» լրատվական գործակալությունը, Երջանկություն կուսակցության անդամ Բեհմեն Այդընի վրա կրակ են բացել, երբ վիճաբանություն է սկսել նրա կողմնակիցների և Արդարություն և զարգացում կուսակցությունից Թիլլոյի քաղաքապետի թեկնածու Մեսութ Մեմդուհօղլուի համախոհների միջև։

Թեկնածուների կողմնակիցների վիճաբանությունը վերածել է զինված բախման, որի ժամանակ Այդընը մահացու վնասվածք է ստացել, ևս 6 հոգի տարբեր աստիճանի վնասվածքներ են ստացել։ Թիլլոյում ընտրությունների արդյունքով հաղթող է ճանաչվել Մեմդուհօղլուն։

Թուրքիայում տեղական ինքնակառավարման մարմինների ընտրություններն անցկացվել են մարտի 30-ին։ Ձայների շուրջ 99 տոկոսի հաշվարկով  Իշխող Արդարություն և զարգացում կուսակցությունը (AKP) ստացել է 45.5, քեմալական Ժողովրդահանրապետական կուսակցությունը (CHP)՝ 27.9, ազգայնամոլական Ազգայնական շարժում կուսակցությունը (MHP)՝ 15.2, քրդական Խաղաղություն և ժողովրդավարություն կուսակցությունը (BDP)՝ 6.3 տոկոս ձայներ:

AllTurkey.am