100 Years. Սերժ Թանկյանը Ցեղասպանության ոգեկոչմանը նվիրված աշխատանք է նախապատրաստում

Ամերիկահայ անվանի երաժիշտ, կատարող Սերժ Թանկյանն այսօր հանդես է գալու Նոր Զելանդիայի Քրայսթչըրչի CBS Arena-ում: Նա ներկայացնելու է իր վերջին՝ Orca ալբոմը՝ տեղի Սիմֆոնիկ նվագախմբի հետ:

Նա կներկայացնի նաև Elect the Dead աշխատանքը՝ աշխատանքներ, որոնք նա այնքան էլ հաճախ չի հանձնում հանդիսատեսի դատին: Տեղի 3 News լրատվամիջոցը զրուցել է Թանկյանի հետ:

Թանկյանը պատմում է, որ իրականում այնքան էլ բարդ չէ System of A Down-ից անցում կատարել սիմֆոնիկ նվագախմբի հետ աշխատանքին: Թանկյանը դա համեմատում է մարզասրահ գնալու հետ: Նա ռոք խմբի հետ ելույթները նմանեցնում է սրտային վարժությունների հետ: Իսկ սիմֆոնիկ ելույթները, ըստ նրա, ավելի անձնական են, ավելի շատ թատրոն են հիշեցնում:

Ըստ Թանկյանի՝ մարդիկ սովոր են խիստ տարբերակել երաժշտության ժանրերը՝ հակադրելով ռոքն ու դասականը: Սակայն իր շոուների ժամանակ նա փորձում է կոտրել կարծրատիպերը. իր սիմֆոնիկ գործերը դասական են՝ բառի ոչ ամենախիստ իմաստով:

Խոսելով ելույթների գործիքային կողմի մասին՝ Թանկյանը շեշտում է, որ Orca-ի 4-րդ գործողության մեջ դուդուկ է հնչում, որի համար իր հետ հայաստանցի երաժիշտ է շրջում:

Երաժիշտն ասում է, որ հասկանում է՝ քննադատները կարող են այնքան էլ չհավանել իր արածը, բայց ինքը ներկայացնում է այն, ինչ ստանում է տիեզերքից, և փորձում է դա անել լավագույնս:

Թանկյանը պատմում է նաև իր և հունական ծագումով նորզելանդացի երաժիշտ Ջոն Փսաթասի համատեղ աշխատանքի՝ 100 Years-ի մասին, որը նվիրված է ցեղասպանությունների թեմային և կթողարկվի հաջորդ տարի: Թանկյանի բնորոշմամբ՝ ցեղասպանությունը ժամանակակից ախտ է:

Այս առնչությամբ նա խոսում է Սիրիայի ճգնաժամի մասին՝ նկատելով, որ մի կողմից բռնապետի հետ գործ ունենք, մյուս կողմից զինյալների, և միջազգային հանրությունը չգիտի, թե ում կողմը բռնի:

Խոսելով ԱՄՆ-ի մասին՝ նա նկատում է, որ կարևոր է ոչ թե զուտ ժողովրդավարական համակարգ ունենալ, այլ ունենալ կիրթ հասարակություն այդ համակարգի համար, այլապես ձեր առաջնորդը կարող է դառնալ Ջորջ Բուշի պես մարդը: Թանկյանը դժգոհում է, որ ԱՄՆ-ում մարդիկ չեն կարդում:

Զրույցի վերջում Թանկյանը խոսում է թերևս ժամանակավորապես Նոր Զելանդիա տեղափոխվելու և որոշ ժամանակով այնտեղ ստեղծագործելու մասին: Նա նկատում է, որ երկրի քաղաքականությունն այդ առումով նպաստավոր է ստեղծագործող մարդկանց համար: Չնայած խոստովանում է, որ 1975-ից ապրում է Լոս Անջելեսում, և ամբողջ երաժշտական բիզնեսը կենտրոնացած է հենց այնտեղ:

http://www.tert.am/am/news/2014/03/28/tankian-on-2014/