Համացանցում հայտնվել է Սիրիայի վերաբերյալ Դավութօղլուի մասնակցությամբ խոսակցության գաղտնալսումը

Համացանցում է հայտնվել Թուրքիայի արտաքին գործերի նախարար Ահմեթ Դավութօղլուի, փոխնախարար Ֆերիդուն Սինիրլիօղլուի, Ազգային հետախուզության ծառայության պետ Հաքան Ֆիդանի եւ ԶՈՒ գլխավոր շտաբի պետի տեղակալ Յաշար Գյուլերի՝ Սիրիայի հետ կապված խոսակցության գաղտնալսումը:

Թուրքական«Ռադիկալը», հղում անելով թուրքական «Յենի շաֆաք» թերթի իտերնետային կայքին, գրում է, որ 4 պաշտոնյաները քննարկել են Սիրիայում տեղի ունեցող իրադարձությունները:

Սենյակում արված գաղտնալսման մեջ, ի թիվս այլ հարցերի, բարձրաստիճան պաշտոնյաները քննարկում են Սիրիայում կատարվող իրադարձությունների հետ կապված Թուրքիայի կատարելիք գործողությունների մի քանի ծրագիր:

Սիրիայի տարածքում թուրքական հող համարվող Սուլեյման Շահի դամբարանի մասին խոսակցության ժամանակ Ազգային հետախուզության ծառայության պետ Հաքան Ֆիդանը նշում է, թե հարկ եղած դեպքում ինքը 4 մարդ կուղարկի Սիրիա, ովքեր այնտեղից 8 հրթիռ կարձակեն Թուրքիայի տարածք եւ Սիրիայի դեմ պատերազմ սկսելու հիմք կստեղծվի:

Ֆիդանը խոսում է նաև այն մասին, որ Սիրիայում գտնվող իրենց բարեկամ ուժերին արդեն 2000 բառնատար զինամթերք են ուղարկել:

Իսկ Ֆիդանի այն հարցադրմանը, թե ինչու՞ է  պետք հենց Սուլեյման շահի դամբարանը հիմք դարձնել պատերազմ սկսելու համար, Դավութօղլուն պատասխանում է, որ Էրդողանն իրեն ասել է, թե դա առավել համոզիչ կլինի:

Ermenihaber.am