Արամ Ա. Կաթողիկոս ՄԱԿին կ’առաջարկէ ապազինել Քեսապի շրջանը

Հինգշաբթի 27 մարտ 2014ի երեկոյեան, Արամ Ա. Կաթողիկոս հեռաձայնային հաղորդակցութիւն մը ունեցաւ Միացեալ Ազգերու Կազմակերպութեան՝ ՄԱԿի ընդհանուր քարտուղար Պան Քի Մունի քաղաքական հարցերու պատասխանատու Ճէֆրի Ֆելթմանի հետ: Այս մասին կը հաղորդէ Կիլիկիոյ կաթողիկոսութիւնը:

Ան վեհափառին յայտնեց, որ ՄԱԿ մտահոգ է Քեսապէն ներս ստեղծուած ապահովական կացութեամբ, աւելցնելով, որ ինք այս ուղղութեամբ հանդիպումներ ունեցած է Սուրիոյ տագնապին գծով, ՄԱԿի եւ արաբական Լիկայի յատուկ պատուիրակ Լախտար Իպրահիմիի հետ, ինչպէս նաեւ տեսակցած է ՄԱԿի մօտ Հայաստանի եւ Թուրքիոյ դեսպաններուն հետ:

Վեհափառ Հայրապետը պարզելէ ետք Ֆելթմանին Քեսապէն ներս տիրող կացութիւնը, այդ գծով շեշտեց թրքական գործոնին կարեւորութիւնը: Նորին Սրբութիւնը առաջարկեց, որ ՄԱԿի կողմէ քննուի Քեսապի շրջանը ապազինելու կարելիութիւնները: Ֆելթմանը շինիչ գտաւ Վեհափառ Հայրապետին առաջարկը եւ խոստացաւ այս ուղղութեամբ Լախտար Իպրահիմիի հետ անհրաժեշտ խորհրդակցութիւնները ունենալ:

http://asbarez.com/arm/188668/