Իսլամիստական «Ալ Նուսրայի ճակատ» խմբավորումը գրավել է Սիրիայի Քեսաբ ավանը։ Թուրքիայի կողմից կործանված սիրիական ինքնաթիռն այնտեղ էր՝ պաշտպանելու հայ, հույն, ալևի, ասորի բնակիչներին։ Նրանք այնտեղ համատեղ էին ապրում, բայց այժմ տարածքը վերահսկում են ծայրահեղական իսլամիստները, գրում է թուրքական Demokrat Haber կայքը՝ անդրադառնալով Քեսաբի դեպքերին։
Այսպիսով՝ Թուրքիայի հետ սահմանն ամբողջությամբ ընդդիմադիրների վերահսկողության տակ է։ Բախումների ընթացքում վիրավորված 17 մարդ տեղափոխվել է Թուրքիա և տեղավորվել տարբեր հիվանդանոցներում։
Դամասկոսի իշխանությունները շաբաթ օրը խստորեն դատապարտել էին Անկարային. սիրիացի պաշտոնյաները պնդում էին, որ զինյալ ապստամբները ներխուժել են Թուրքիայի տարածքից։
Հաթայի Յայլադաղը շրջանում Սիրիայի սահմանային անցակետի գրավումն ընդդիմադիրների կողմից Սիրիային ամբողջությամբ զրկեց թուրք-սիրիական սահմանը վերահսկելու հնարավորությունից։ Այժմ Թուրքիայի հետ սահմանային բոլոր անցակետերը հսկում են ընդդիմադիրները։ Սիրիան սահմանի մերձակայքում օդային գործողություններ ևս չի կարողանում իրականացնել՝ Թուրքիայի սպառնալիքի պատճառով. սահմանին մոտեցող ուղղաթիռներին ու ինքնաթիռներին արձագանքում է Թուրքիան։
Վերջին սիրիական ինքնաթիռը կործանվել էր Թուրքիայի սահմանից 7 կմ հեռավորությամբ։
Սիրիական սահմանի տարբեր անցակետերի վերահսկողությունն այժմ Սիրիայի ազատ բանակի, Քրդական աշխատավորական կուսակցության սիրիական թևի և «Իրաքի և Լևանտեի իսլամական պետություն» ահաբեկչական համարվող խմբավորման ձեռքում են։
Արդեն իսկ պարզ է, որ դեպի Լաթաքիա տանող Յայլադաղը սահմանադռնից ելումուտ են անում զինված խմբավորումները, հայտնում է աղբյուրը։
Բնակավայրի գրավումից հետո մոտ 5.000 բնակիչ է փախել Լաթաքիա։ Թուրքիայի միակ հայկական գյուղի՝ Հաթայ նահանգում գտնվող Վաքըֆլըի բնակիչներն անհանգիստ են Քեսաբում ապրող իրենց ազգականների վիճակով։
«Քեսաբում շատ ազգականներ ունենք։ Այժմ որևէ մեկի հետ կապ հաստատել չենք կարողանում։ Նրանց առողջական վիճակը մեզ մտահոգում է։ Տեղեկություններ կան, թե մոտ 3.000 հայ ապաստան է գտել Լաթաքիայի հայկական եկեղեցում։ Նրանց տները լքված են, և մտահոգվում ենք, որ դրանք կարող են թալանվել»,-ասել է Վաքըֆլի հայկական եկեղեցու հոգևոր պաշտոնյա Ավետիս Թաբաշյանը։
Վաքըֆլը գյուղի գյուղապետ Պերճ Քարթումը տեղեկացրել է, որ Քեսաբում ապրող հայերից ոչ մեկ Թուրքիայում ապաստան չի ստացել։ «Ընդդիմադիրները Թուրքիայի հետ սահմանից են կրակ բացել, այդ պատճառով էլ դեպի սահման փախչելը հնարավոր չէր»,-ասել է գյուղապետը։
Հայերը բախումների սկզբից իսկ լքել են բնակավայրը։ «Քեսաբը 1915թ. հրաշքով փրկված եզակի վայրերից մեկն էր»,-ասել է Սիրիայի հարցով մասնագետ, ֆրանսիացի Ֆաբրիս Բալանշը։
Հիշեցնենք, որ ուրբաթ Թուրքիայի տարածքից, միաժամանակ 3 կետերից հարձակում էր սկսվել հայաբնակ Քեսաբ ավանի վրա։
Հարձակման հետևանքով բնակչության 99 տոկոսը տարհանվել է, տեղափոխվել Լաթաքիա ու ապաստան գտել հայկական եկեղեցում և հարակից շինություններում։
Այժմ Քեսաբի համար պայքարը կառավարական ուժերի և ահաբեկչական խմբավորումների միջև շարունակվում է։
http://www.tert.am/am/news/2014/03/26/kesab-dh/
Leave a Reply