Թուրքիայի թուրքմենները թալանում են քեսապահայերի ունեցվածքը եւ բեռնատարներով տեղափոխում Թուրքիա

Քեսապի Քարադուրան գյուղի բնակիչ Հասմիկ Մանջիկյան-Պէրպէրյանի հայտնած վերջին տեղեկությունների համաձայն` Թուրքիայի սահմանին բնակվող թուրքմենները թուրք-սիրիական սահմանի փշալարերը բացել են և ներխուժել Քեսապ:

Նրանք հայերի ունեցվածքը թալանում են և բեռնատարներով տեղափոխում Թուրքիա: Իսլամիստ ապստամբներն էլ Քեսապի հայկական եկեղեցին դարձրել են զորանոց:

Սոցիալ-դեմոկրատ հնչակյան կուսակցության (ՍԴՀԿ) փոխատենապետ, սիրիահայ Վազգեն Մեսրոպյանը համոզված է, որ Քեսապի հայության տեղահանումը Թուրքիայի նպատակն էր:

Նրա խոսքով` ինչքան մոտենում ենք Հայոց ցեղասպանության 100-ամյակին, Թուրքիան, մասնավորապես Էրդողանը, հաշվեհարդար է տեսնում Սիրիայում հայ բնակչության հետ:

«Այսօր առավոտյան տեղեկացանք, որ սկսել են հայ ընտանիքների տները այրել, ջարդել, թալանել, փշրել: Այս որերորդ դեպքն է հայերին տեղահանում են, ինչքա՞ն կարելի է։ Հայաստանի կառավարությունը, նախագահը կամ արտգործնախարարությունը պետք է լուրջ քայլերի դիմեն և ճնշումներ գործադրեն Թուրքիայի վրա»,-նշել է նա:

Նշենք, որ պատմության մեջ սա Քեսապի երրորդ հայաթափումն էր: 1909 թվականին թուրքերի հարձակումից հետո հայերը տեղափոխվեցին Լաթաքիա, իսկ 1915 թվականին՝ Դեր-Զոր և դեպի Հորդանան:

Արաբագետ Արմեն Պետրոսյանի կարծիքով` օգտվելով Ուկրաինայի շուրջ զարգացող իրադարձություններից` Սիրիայի հակամարտության մեջ դերակատար երկրները երկրի ներսում ռազմական դրությունը փորձում են փոխել հօգուտ իրենց:

«Թուրքիան մի ձեռքով երկու նապաստակ խփեց: Սա մարտավարական քայլ էր: Քեսապի վրա հարձակումը նշանակում է, որ ռազմական գործողությունները իսլամիստ-ընդդիմադիրները հարավ-աևմուտքից տեղափոխում են հյուսիս-արևմուտք, որպեսզի ավելի ուժեղ հարվածեն Դամասկոսին»,- նշեց նա:

Ըստ նրա` սիրիական ճգնաժամի կարգավորման նախկին Ժնև-2 ձևաչափը այլևս արդյունավետ չի լինի:  
Արմեն Պետրոսյանը Հաագայում նախագահ Սերժ Սարգսյանի՝ Քեսապի վերաբերյալ ելույթի ենթատեքստում տեսնում է մեղադրանք՝ ուղղված Թուրքիային: Արաբագետը համոզված է, որ սա այն պահն է, որ Հայաստանն ու Սփյուռքը պետք է միավորեն իրենց ջանքերը խնդրին լուծում տալու համար:

http://haynews.am/hy/1395741504