Հայոց երկու կաթողիկոսները քննարկել են Քեսաբում ստեղծված իրավիճակը

Ամենայն հայոց կաթողիկոս Գարեգին Բ–ն մարտի 24-ին հեռախոսազրույց է ունեցել Մեծի Տանն Կիլիկիո Կաթողիկոս Արամ Ա–ի հետ` Քեսաբի եւ շրջակա բնակավայրերի բռնազավթման առնչությամբ, որի հետեւանքով տարհանվել է քաղաքացիական բնակչությունը, մեծավ մասամբ հայ ընտանիքներ, ավերվել եւ հրկիզվել են տներ, պղծվել սրբավայրեր:

Գարեգին Բ-ն իր խորը մտահոգությունն է արտահայտել կատարվածի առնչությամբ եւ դատապարտել Քեսաբի խաղաղ բնակչության նկատմամբ ծայրահեղականների իրականացրած ահաբեկչական գործողությունները, որոնք աջակցություն են ստացել Թուրքիայի կողմից: Զրույցի ընթացքում նա իր զորակցությունն է հայտնել Արամ Ա Կաթողիկոսին:

Քեսաբում ստեղծված կացության վերաբերյալ Գարեգին Բ-ն հեռախոսազրույց է ունեցել նաեւ Դամասկոսի Հայոց թեմի առաջնորդ Գերաշնորհ Տ. Արմաշ եպիսկոպոս Նալբանդյանի հետ:

Գարեգին Բ-ն Մայր Աթոռում հրավիրված խորհրդակցության ընթացքում հաստատել է, որ Սուրբ Էջմիածինը աշխարհասփյուռ իր թեմական կառույցներով շարունակելու է իր աջակցությունը սիրիահայությանը` աղոթելով, որ խաղաղությունը վերահաստատվի Սիրիայի աստվածասեր ժողովրդի կյանքում, եւ տեղահանված ու գաղթական ընտանիքները վերադառնան իրենց հայրենի օջախները:

http://news.am/arm/news/200804.html