Աբդուլլահ Գյուլը մեկնաբանել է սիրիական ինքնաթիռը կործանելու փաստն ու կոչ է արել չքաղաքականացնել

Թուրքիայի նախագահ Աբդուլլահ Գյուլը հայտարարությամբ է հանդես եկել թուրք-սիրիական սահմանին թուրքական կողմի հարվածից կործանված սիրիական ինքնաթիռի կապակցությամբ:
Ինչպես տեղեկացնում է TRT Haber կայքը, ինքնաթիռի մասին Գյուլը խոսել է Հաագայում ընթացող Միջուկային անվտանգության գագաթնաժողովի ընթացքում` պատասխանելով լրագրողների հարցերին:
«Հաշվի առնելով Սիրիայում տիրող իրավիճակը՝ մեր զինված ուժերն այս վտանգավոր իրավիճակում զգոնություն են ցուցաբերել: Մեր սահմանի անվտանգության պահպանության համար նրանք իրականացրել են իրենց պարտականությունը»,- ասել է Գյուլը:
Նա ընդգծել է, որ դա ազգային հարց է և պետք չէ քաղաքականացնել:
Հիշեցնենք, որ սիրիական ինքնաթիռը կործանվել էր Քեսաբ հայաբնակ ավանի մոտ մարտական գործողություն իրականացնելու ժամանակ: Ինքնաթիռի փրկված օդաչուն տեղեկացրել է, որ միջադեպը տեղի է ունեցել ոչ թե Թուրքիայի տարածքում, այլ թուրքական սահմանից 7 կմ հեռու:

http://www.tert.am/am/news/2014/03/25/syria-turkey-border/