Դինքի սպանության վերաբերյալ դատական երկու գործերը կարող են միավորվել

Հայտնի պոլսահայ լրագրող Հրանտ Դինքի սպանության նախապատրաստության ընթացքում, չնայած եղած տեղեկություններին, քայլեր չձեռնարկելու և լիազորությունները չկատարելու համար մեղադրվող Տրապիզոնի ժանդարմերիայի հրամանատար Ալի Օզի դատավարությունը շարունակվել է։

Ինչպես տեղեկացնում է «Ակօս» թերթի կայքը, Տրապիզոնի դատարանը վճռել է նամակով դիմել Ստամբուլի ծանր հանցագործությունների 5-րդ դատարան, որտեղ շարունակվում է Դինքի գործի կրկնակի քննությունը` երկու գործերը միավորելու հարցով։

Տրապիզոնի ծանր հանցագործությունների 1-ին դատարանում տեղի ունեցած նիստին մասնակցել են կասկածյալ Ալի Օզը, նրա փաստաբան Ալի Սյուրմենը, ինչպես նաև Դինքի ընտանիքի փաստաբաններ Հաքան Բաքըրջըօղլուն և Բահրի Բայրամ Բելենը։

Դինքի ընտանիքի փաստաբան Բաքըրջըօղլուն պահանջել է ստուգել ժանդարմերիայի արխիվները՝ պարզելու՝ արդյոք կառույցը որևէ տեղեկություն ստացել է նախքան սպանությունը, ինչպես նաև պահանջել է, որ կրկին հարցաքննվեն Տրապիզոնի ժանդարմերիայի 6 աշխատակիցներ։

Բաքըրջըօղլուն նշել է, որ Տրապիզոնում Դինքի սպանության դատավարության և Ստամբուլում ընթացող դատավարության միջև իրավական և փաստացի կապ կա, ուստի խնդրել է միավորել գործերը։

Դրանից հետո դատարանը վճռել է գրություն ուղարկել Ստամբուլի ծանր հանցագործությունների 5-րդ դատարան և հետաձգել է դատական նիստը։

http://www.tert.am/am/news/2014/03/21/dink-trapzon-stambul/