Թուրքիայում ազատ է արձակվել հակահայ պաշտոնաթող գեներալ Վելի Քյուչյուքը

Թուրքիայում Էրգենեքոնի գործով 86 տարի ազատազրկման դատապարտված պաշտոնաթող գեներալ Վելի Քյուչուքը եւս ազատ է արձակվել։

Թուրքիայում վարչապետ Ռեջեփ Թայիփ Էրդողանի եւ Գյուլենի հասարակական-կրոնական շարժման առաջնորդ Ֆեթուլլահ Գյուլենի միջեւ ծայր առած հակասությունների համատեքստում դատական համակարգի կարեւոր պաշտոններից գյուլենականներին հեռացնելուց հետո իշխանությունները սկսել են ազատ արձակել Էրգենեքոնի գործով դատապարտվածներին։  

Ազատ արձակվածների մեջ է պաշտոնաթող գեներալ Վելի Քյուչյուքը, ով հայտնի է խիստ հակահայկական գործունեությամբ։  

Նրա անունը կապվում է Հրանտ Դինքի սպանության կազմակերպման հետ։ Հայտնի է, որ նա Հայաստանի դեմ հատուկ գործողություններ ծրագրող կառույց է ղեկավարել։

Նշենք, որ Էրգենեքոնի գործով ազատ արձակվածների մեջ է Պոլսո հայոց պատրիարքի եւ Սվասի հայերի առաջնորդի դեմ մահափորձ կազմակերպած Իբրահիմ Շահինը։ 

http://news.am/arm/news/198558.html