Hurriyet. «Ազնավուրը ցանկություն է հայտնել բաց տեսնել հայ-թուրքական սահմանը»

Համաշխարհային հռչակ վայելող ֆրանսահայ երգիչ Շարլ Ազնավուրը իտալական «Corriere della Sera» թերթին տված հարցազրույցում ցանկություն է հայտնել բաց տեսնել 1992-ից ի վեր Անկարայի կողմից միակողմանիորեն փակված հայ–թուրքական սահմանը: Մեծանուն շանսոնիեի սույն հարցազրույցին անդրադարձել է թուրքական «Հյուրրիյեթ» պարբերականը, որն ուշադրություն է հրավիրել հարցազրույցից որոշ դրվագների վրա:

«Ազնավուրը համոզմունք է հայտնել, որ եթե Հայաստանն ունենար Ադրբեջանի նավթային պաշարները, ապա այսօր գոյություն ունեցող խնդիրները բնավ չէին լինի»:

Նա նաև նշել է, որ մինչև այժմ էլ համերգներ տալու բազմաթիվ առաջարկներ է ստանում Թուրքիայից, բայց չի կարողանում փակ սահմանների պարագայում դրանք ընդունել, քանի որ չի ցանկանում «գործիք ծառայել որևէ խաղի»:

«Հյուրրիյեթը» հիշեցնում է, որ Ազնավուրը մշտապես պայքարում է Հայոց ցեղասպանության միջազգային ճանաչման համար: Իսկ ցեղասպանություն եզրից այդպես խուսափող Թուրքիային նույնիսկ կոչ է արել թեկուզ այլ բառով բնութագրել 1915-ի կատարվածը, միայն թե հարկավոր է ընդունել նախորդ դարասկզբին հայ ժողովրդի կրած ողբերգությունը: 

http://ermenihaber.am/?lang_id=2&news_=4&cur_news=1492