Սևան Նշանյանին դարձյալ տեղափոխել են այլ բանտ, այս անգամ՝ ավելի լավ պայմաններով

Իզմիրի Բուջա խստացված ռեժիմով բանտում «անկողին չունենալու» պատճառաբանությամբ օրեր շարունակ բետոնե հատակին քնած հայ լրագրող, մտավորական Սևան Նշանյանին տեղափոխել են այլ՝ Ալիաղայի բանտ։

«Ակօս»-ի հետ զրույցում Նշանյանի ընկերներից Ալի Նեսինը նշել է, թե այսօր այցելել է Նշանյանին։ Նեսինը նշել է նաև, որ այս բանտում պայմաններն ավելի լավ են։

Սևան Նշանյանի փաստաբան Մուրադ Աքչըն իր հերթին նշել է, որ Թորբալըի բաց բանտի ղեկավարության կողմից առաջադրված «բանտապահին սպառնալու և զրպարտելու» մեղադրանքը կքննվի մարտի 27-ին մեկնարկելիք դատավարության ընթացքում։

Աքչըն նշել է, որ այդ դատավարության ընթացքում պարզ կլինի, թե դեռ որքան պետք է Նշանյանը մնա խիստ ռեժիմով բանտում։

Մոտ մեկ շաբաթ առաջ Թորբալըի բաց բանտից այլ բանտ տեղափոխված Նշանյանն անկողին չլինելու պատճառով քնում էր սառը հատակին, և նրան թույլ չէին տալիս լոգանք ընդունել։

http://www.tert.am/am/news/2014/03/07/nishanyan-prison/