Պոլսահայ գրող Սևան Նշանյանին խստացված ռեժիմով գաղութ են տեղափոխել

Պոլսահայ գրող, լեզվաբան Սևան Նշանյանը «Թորբալը» բանտից տեղափոխվել է «Բուջա» խստացված ռեժիմով գաղութ:

Թուրքական  «Դեմոկրատ հաբեր» լրատվական կայքի հոդվածագիր Հրանտ Գասպարյանը անդրադարձել է Նշանյանի տեղափոխության հարցին: Նա  նշել է, որ Նշանյանը բանտապահին մեղադրել է գողության մեջ: Այդ առնչությամբ հետաքննություն է սկսվել, որից հետո Նշանյանին տեղափոխել են  խստացված ռեժիմով գաղութ: Կայքը նշում է, որ  այդ որոշումը  Նշանյանին  պատժելու նպատակ է հետապնդում:

Այս որոշումը դժգոհություն է առաջացրել թուրք մտավորականների շրջանում: Ալի Նեսինը Նշանյանի տեղափոխության մասին որոշումը նույնպես կապում է բանտապահի  կողմից գողության փաստի բացահայտման հետ: Նեսինը «Facebook» սոցիալական կայքում էջ է բացել, որտեղ պահանջում է անմիջապես վերջ դնել Նշանյանի խոսքի, արտահայտվելու, աշխատելու և ուսումնասիրություններ կատարելու ազատությանը խոչընդոտող սահմանափակումներին և ճնշումներին:

Իսկ գրող Սաիթ Չեթինօղլուն, իր մտահոգությունը հայտնելով Նշանյանի կալանքի խստացման առնչությամբ, ընդգծել է, որ պետությունը, չնայած երկրում տիրող խառանշփոթին, չի մոռանում Սևան Նշանյանի մասին և արդեն նրան աքսորել է ավելի խիստ ռեժիմով բանտ:

Կայքի փոխանցմամբ՝ Նշանյանը փետրվարի 19-ին լրագրող Հասան Ջեմալին ուղղված նամակում հայտնել էր, որ բանտում իր նկատմամբ խտրական վերաբերմունք են ցուցաբերում:

http://ermenihaber.am/?lang_id=2&news_=4&cur_news=1471