Յունաստանի խորհրդարանի նախագահը յարգեց Ցեղասպանութեան զոհերուն յիշատակը

ԵՐԵՒԱՆ, «Արմէնփրէս».– Յունաստանի խորհրդարանի նախագահ Էվանկելոս Մէյմարաքիսի գլխաւորած պատուիրակութիւնը 25 փետրուարին այցելեց Ծիծեռնակաբերդ։ Հայաստանի Ազգային ժողովի փոխնախագահ Էդուարդ Շարմազանովի ընկերակցութեամբ Էվանկելոս Մէյմարաքիս ծաղկեպսակ զետեղած է Մեծ Եղեռնի զոհերու յուշարձանին առջեւ:
Յունաստանի խորհրդարանի նախագահն ու անոր ընկերակցողները նաեւ ծաղիկներ զետեղեցին Մեծ Եղեռնի զոհերուն յիշատակը յաւերժացնող անմար կրակին մօտ եւ մէկ վայրկեան լռութեամբ յարգեցին անմեղ զոհերուն յիշատակը:
Անոնք նաեւ այցելեցին Յիշողութեան պուրակ, ուր Յունաստանի խորհրդարանի նախագահը տնկած է արծաթափայլ եղեւնի:
Հայաստանի Ազգային ժողովի նախագահ Յովիկ Աբրահամեանի հրաւէրով 25 փետրուարին երկօրեայ պաշտօնական այցելութեամբ Հայաստան հասած յունական պատուիրակութիւնը նաեւ հանդիպումներ պիտի ունենայ Հայաստանի նախագահ Սերժ Սարգսեանի, Գարեգին Բ. Ամենայն Հայոց կաթողիկոսին, Ազգային ժողովի նախագահ Յովիկ Աբրահամեանի, վարչապետ Տիգրան Սարգսեանի, արտաքին գործոց նախարար Էդուարդ Նալբանդեանի, Հայաստանի Ազգային ժողովի Հայաստան-Յունաստան բարեկամական խումբի անդամներուն հետ:

http://asbarez.com/arm/186038/