Հակակառավարական ցույցեր Ստամբուլում և Անկարայում

Թուրքիայի մի շարք հատվածներում փետրվարի 25-ի երեկոյան ցույցեր են անցկացվել, որի մասնակիցները դժգոհել են կառավարությունից՝ այն որակելով որպես կոռումպացված։

«Ամենուր կոռուպցիա է, ամենուր հանցավորություն» անունը կրող ակցիան անցկացվել է Ստամբուլում, Անկարայում և Էսքիշեհիրում։ Ցույցերն անցել են ոստիկանների հետ բախումներով։ Ցուցարարներն իրենց դժգոհությունն են արտահայտել Թայիփ Էրդողանի գլխավորած կառավարության դեմ, հակակառավարական կոչեր հնչեցրել, ինչպես նաև` իշխող Արդարություն և զարգացում կուսակցությանը վիրավորող տողեր գրել պատերին։

Հիշեցնենք, որ կոռուպցիոն սկանդալի հետևանքով 2013-ի դեկտեմբերի 17-ին Թուրքիայում ձերբակալվել է 5 տասնյակից ավել մարդ, ինչին հետևել են այս գործի քննությամբ զբավող պաշտոնյանների զանգվածային հեռացումները ոստիկանության շարքերից, ինչը համարում են թուրքական կառավարության պատասխան քայլն իրավապահների սկսած գործողությունների դեմ։

Հիմնականում Ստամբուլում անցկացված լայնածավալ գործողության ժամանակ ձերբակալվել էին Թուրքիայի էկոնոմիկայի նախարար Զաֆեր Չաղլայանի, ներքին գործերի նախարար Մուամմեր Գյուլերի և քաղաքաշինության ու շրջակա միջավայրի նախարար Էրդողան Բայրաքթարի որդիները, իրանական ծագմամբ ադրբեջանցի գործարար Ռըզա Զարրաբան, պետական «Հալքբանկի» գործադիր տնօրեն Սուլեյման Ասլանը և այլք։ Նրանք մեղադրվում են Ստամբուլում կաշառքի դիմաց շինարարություն կատարելու, այլ ֆինանսական բնույթի հանցագործությունների համար։ Հայտնի էր դարձել, որ իրավապահները գաղտնալսել են նաև Թուրքիայի նախագահի և վարչապետը հեռախոսները։

Ձերբակալվածներից 25-ի նկատմամբ որոշվել է որպես խափանման միջոց ընտրել կալանքը, իսկ մի մասն ազատ է արձակվել, այդ թվում՝ Բայրաքթարի որդին։

Տեղեկություններ են շրջանառվում, թե այս ձերբակալությունների հետևում կանգնած են գյուլենական շարժման անդամները, ովքեր դժգոհ են իշխող Արդարություն և զարգացում կուսակցության քաղաքականությունից, մասնավորապես, Թուրքիայում գյուլենական դպրոցների փակման նախաձեռնությունից։

Հետաքրքիր է, որ գյուլենական շարժումն ու Արդարություն և զարգացում կուսակցությունն ավելի վաղ հայտնի էին իրենց սերտ հարաբերություններով։

AllTurkey.am