Գորշ գայլերի կուսակցությունը հայ թեկնածու է առաջադրել

Թուրքիայի տեղական ինքնակառավարման մարմինների ընտրություններին մասնակցող կուսակցությունների մեծամասնությունը Ստամբուլի Բաքըրքոյ թաղամասի թաղապետի պաշտոնում առաջադրել է հայ թեկնածուներ: Սակայն, ամենահետաքրքիրն այն է, որ հայ թեկնածու է առաջադրել նաև շեշտված հակահայկականությամբ աչքի ընկնող Ազգայնական շարժում (ԱՇԿ) կուսակցությունը:

Ազգայնական տրամադրություններով աչքի ընկնող Vatan թերթը, տեղեկացնելով ԱՇԿ-ի կողմից հայ թեկնածուների առաջադրման մասին, գրում է, որ կուսակցությունները պայքարում են Բաքըրքոյ թաղամասում ապրող և ընտրության իրավունք ունեցող մոտ 20 հազար հայերի ձայների համար:

Բաքըրքոյի թաղապետի ընտրություններում ԱՇԿ-ի ներկայացրած թեկնածուների ցուցակը գլխավորում է Ներսես Երամյանը, իսկ հինգերորդ տեղում  կրկին հայ է՝ Էլմաս Գիրագոսը:

Մասնագիտությամբ ատամնաբույժ, 65-ամյա Ներսես Երամյանը թուրքական Vatan թերթին  հարցազրույց է տվել և պարզաբանել, թե ինչու է առաջադրվում Ազգայանական շարժում կուսակցության կողմից. «Եթե ապրում ենք այս երկրում՝ պետք է ազգայնական լինենք: Եթե ազգայնական չենք՝ այս երկրում գործ չունենք: Համալսարաններում էլ անդամակցել եմ ազգայնական կազմակերպություններին: Եթե ազգայնական չլինեի՝ մուսուլման կնոջ հետ չէի ամուսնանա»:

Ներսես Երամյանն ասել է նաև, որ մոր կողմից հույն է, կարողանում է հայերենի պես վարժ հունարեն խոսել, և ամեն անգամ  Հունաստան գնալիս պաշտպանում է Թուրքիայի շահերը:

Երեմյանն ասել է նաև, որ ինքը կարիք չունի հետ նայելու և իրեն չեն հետաքրքում այն բացասական արձագանքները [նկատի ունի հայկական համայնքից ստացվող բացասական արձագանքը-ՍիվիլՆեթ], որոնք ստանում է Ազգայնական շարժում կուսակցության կողմից առաջադրվելուց հետո:

Առաջին անգամ չէ, որ Բաքըրքոյի թաղապետի ընտրություններին Ազգայնական շարժումը հայ թեկնածու է առաջադրում: 2009 թ. Բաքըրքոյի թաղապետի խորհրդի անդամության պաշտոնում ներկայացվել էր ազգությամբ հայ Հաչո Քելեշի թեկնածությունը:

Ավելին՝ ազգայնամոլական այս կուսակցության գաղափարախոս ու առաջնորդ Ալփասլան Թյուրքեշի մերձավոր գործընկերն է եղել Լևոն Փանոս Դաբաղյանը, որը կուսակցության կողմից 1973 թ. առաջադրվել է Թուրքիայի Ազգային մեծ ժողովի պատգամավորի  թեկնածու:

Լևոն Փանոս Դաբաղյանն ակտիվ հակահայկական քաղաքականություն է վարում, հանդես գալիս Հայոց ցեղասպանություն ժխտմամբ և պնդում, թե  հայերը Օսմանյան կայսրությունում  ապահով կյանք էին վարում: Նա նաև հայտարարում է, որ եթե հայ-թուրքական նոր պատերազմ սկսվի, ինքը կկռվի թուրքական ճակատում՝ ընդդեմ Հայաստանի: Նրա «Հայերի տեղահանությունը» գիրքը Թուրքիայի Ազգային կրթության նախարարությունը ներառել է պարտադիր ընթերցվող դպրոցական գրքերի ցուցակում: Վերոնշյալ գրքում Լևոն Փանոս Դաբաղյանը պնդում է, թե ցեղասպանություն տեղի չի ունեցել: Թուրքերը, գովաբանելով Լևոն Փանոս Դաբաղյանին, գրում են՝ «հայերը լինում են նաև նրա պես»:

Ընդունված է ասել, որ Ազգայնական շարժում կուսակցությունը Գորշ գայլեր պանթուրքիստական կազմակերպության քաղաքական թևն է:

Թուրքիայում մեծ կարևորություն ունեցող տեղական ինքնակառավարման մարմինների ընտրությունները նշանակված են մարտի 30-ին:

http://civilnet.am/%E2%80%8B%E2%80%8Belections-turkey-mhp-armenian-candidate-bakirkoy-nerses-yeramyan/