ԱՄՆ-ի Կոնգրեսի շենքում Հայոց ցեղասպանության զոհերի հիշատակին նվիրված միջոցառում կկայանա. «Ամերիկայի ձայն»

ԱՄՆ–ի Ներկայացուցիչների պալատում Քալիֆորնիա նահանգից ընտրված դեմոկրատական կուսակցության կոնգրեսական, «Հայոց ցեղասպանություն. Ճշմարտություն եւ արդարություն» (H. Res. 227) բանաձեւի հիմնական հեղինակ Ադամ Շիֆը այս տարվա մարտի 3-ին Կապիտոլյան բլուրում անցկացնելու է միջոցառում, որը նվիրված կլինի Միացյալ Նահանգների կողմից Հայոց ցեղասպանության զոհերին օգնություն տրամադրելուն ուղղված արշավին, որը նպաստել էր ԱՄՆ–ի կողմից արդեն գրեթե հարյուր տարվա ընթացքում ամբողջ աշխարհում մարդասիրական օգնության տրամադրման աննախադեպ առաջնորդության մեկնարկին, հաղորդում է «Ամերիկայի ձայն» ռադիոկայանը: 

Այս մասին ասված է կոնգրեսական Շիֆի գրասենյակի մամուլի հաղորդագրության մեջ, որի համաձայն` Կապիտոլյան բլուրում կայանալիք միջոցառումը նպատակ է հետապնդում ուսուցանելու ԱՄՆ-ի օրենսդիրներին, իրենց անձնակազմին եւ համայնքին Միացյալ Նահանգների կողմից ցեղասպանության թիրախը դարձած հայ ժողովրդին տրամադրված աջակցության, ինչպես նաեւ ամբողջ աշխարհում տառապող մարդկանց մարդասիրական օգնություն տրամադրել շարունակելու անհրաժեշտության մասին:

«Հայոց ցեղասպանության զոհերի նկատմամբ Ամերիկայի հոգատարության եւ կարեկցանքի ոգին ըստ էության լավագույնս նշանավորում է «Հայ որբերի գորգը»՝ արվեստի մի գործ, որը ստեղծվել էր Ցեղասպանությունը վերապրած երիտասարդների կողմից եւ որպես նվեր ուղարկվել ԱՄՆ-ի Սպիտակ տուն «Մերձավոր Արեւելքում ամերիկյան նպաստամատույց կոմիտե»-ի կողմից՝ բարեգործական այն կազմակերպության, որի ստեղծումը ոգեշնչել էր նախագահ Ուիլսոնը, իսկ հիմնադրումն իրականացվել էր ԱՄՆ-ի Կոնգրեսի կողմից ընդունված օրենքի հիման վրա», – ասված է Ադամ Շիֆի գրասենյակի մամուլի հաղորդագրության մեջ: – «Ցավոք, ամերիկյան մեծահոգության այս խորհրդանիշը ցուցադրման համար դեռեւս չի տրամադրվել ԱՄՆ-ի Սպիտակ տան կողմից, ինչի հետեւանքով չեղյալ էր հայտարարվել 2013 թվականի դեկտեմբերին Գորգի ցուցադրման հետ կապված միջոցառումը, որը պետք է անցկացվեր «Սմիթսոնիան» թանգարանում»:

«Հուսով ենք՝ ԱՄՆ-ի Սպիտակ տունը կհամաձայնվի տրամադրել «Հայ որբերի գորգն» այս միջոցառման համար, սակայն նման հանձնառության բացակայության պայմաններում այս միջոցառումն այնուամենայնիվ կկայանա», – նշված է Ադամ Շիֆի գրասենյակի մամուլի հաղորդագրության մեջ:

Հիշեցնենք, որ կոնգրեսական Շիֆը եւ ԱՄՆ-ի եւս 32 կոնգրեսականներ դրել են իրենց ստորագրություններն անցյալ տարի ԱՄՆ-ի Սպիտակ տանը հասցեագրված նամակի տակ, որը կոչ է անում փոխել Օսմանյան կայսրությունում 1915-ից 1923 թվականներին իրականացված Հայոց ցեղասպանության ժամանակ ԱՄՆ-ի կողմից ցուցաբերված մարդասիրական օժանդակության համար որպես երախտապարտություն ԱՄՆ-ի նախկին նախագահ Քալվին Քուլիջին նվիրաբերված գորգի հանրային ցուցադրման արգելման մասին որոշումը:

Առավել մանրամասն սկզբնաղբյուր կայքում:

http://news.am/arm/news/194944.html