«Սամաթիայի հանցագործը» հայտարարել է, որ հայ կնոջն ինքը չի սպանել

Ստամբուլի Սամաթիա թաղամասում նախորդ տարի հայ կանանց վրա իրականացված հարձակումների և նրանցից մեկի մահվան համար մեղադրվող ազգությամբ հայ Մուրադ Նազարյանի դատավարությունը երեկ շարունակվել է։

Ինչպես տեղեկացնում է «Ակօս» շաբաթաթերթի կայքը, դատավարության ընթացքում Մուրադ Նազարյանը հայտարարել է, որ ինքը ոչ ոքի չի սպանել։

Ստամբուլի ծանր հանցագործությունների 2-րդ դատարանում կայացած նիստին մասնակել են Մուրադ Նազարյանը և սպանված Մարիսա Քյուչուքի մերձավորներն ու փաստաբանները։

«Ես ոչ մեկի չեմ սպանել»,-ասել է Մուրադ Նազարյանը։ Մարիսա Քյուչուքի դուստրը՝ Պայծառ Միդիլլին, ևս ելույթ է ունեցել։

«Նա ասում է, որ իրեն սպառնում են։ Ո՞վ, ինչո՞ւ է սպառնում։ Ո՞ւմ ես պաշտպանում։ Իմ մորից ի՞նչ եք ուզել»,-ասել է նա։

Դատարանը որոշել է երկարաձգել Մուրադ Նազարյանին կալանքի տակ պահելու որոշումն ու դատական նիստը հետաձգել մինչև մարտի 12-ը։

Երբ նոր էր ձերբակալվել, կասկածյալը հայտարարել էր, որ եթե իրեն ձերբակալել են, ուրեմն ինքն է մեղավոր։ Ենթադրվում էր, որ Մուրադ Նազարյանը հոգեկան խնդիրներ ունի։

http://www.tert.am/am/news/2014/02/14/samatya-murat-nazaryan/