Թուրքիայի խորհրդարանի սահմանադրական հանձնաժողովն ընդունել է «ժողովրդավարացման փաթեթը»

Թուրքիայի ազգային մեծ ժողովի սահմանադրական հանձնաժողովն ընդունել է Թուրքիայի կառավարության ներկայացրած «ժողովրդավարացման փաթեթը», որով որոշակիորեն ընդլայնվում էին այդ երկրում բնակվող ազգային փոքրամասնությունների (հիմնական քրդերի) իրավունքները։ Դեռևս հոկտեմբերին ներկայացված փաթեթն օրերս դրական արձագանք է ստացել թուրքական խորհրդարանի սահմանադրական հանձնաժողովի կողմից, ինչը նշանակում է, որ նրա ճանապարհին կանաչ լույս է վառվել։

Նոր օրենսդրական փոփոխություններով թույլատրվում է Թուրքիայի տարածքում այլ լեզուներով և բարբառներով նախընտրական քարոզարշավ իրականացնել,  հանվում է պետական կառույցներում գլխաշոր կրելու արգելքը, թույլատրվում է օգտագործել քրդերենում առկա Q, X, W տառերը, մասնավոր դպրոցներում կթույլատրվի քրդերենի ուսուցումը, հեշտացվում է գյուղերի անվանափոխությունն ու նախկին անունների վերականգնումը, խստացվում է այլատյացություն և ատելություն քարոզելու համար պատիժները, առաջարկվում է խորհրդարանի անցումային շեմը 10 տոկոսից իջեցնել 5 տոկոսի կամ վերացնել այն՝ անցնելով ըստ շրջանների ընտրությունների և այլն։

Կարևոր կետերից է նաև հանրակրթական դպրոցներում դասերից առաջ տրվող տխրահռչակ երդման վերացումը, որում կա «Ես թուրք եմ, ես ճիշտ եմ, ես թուրք եմ, ես հպարտ եմ» և այլ նմանատիպ արտահայտություններ։

Փաթեթով նախատեսվում է նաև ասորիներին վերադարձնել Մոր Գաբրիելի վանքը, ստեղծել Գնչուների լեզվի և մշակույթի ինստիտուտ, սակայն փաթեթից դուրս է մնացել Հեյբելի կղզու հույն ուղղափառ եկեղեցու հոգևոր դպրոցի վերաբացման հարցը։

AllTurkey.am