Թուրքիայում շատ վանքեր ու եկեղեցիներ լքված վիճակում են։ Այն հողատարածքների սեփականատերերը, որոնց տարածքում վանքեր կան, կամ փորձում են ժխտել դրանց գոյությունը, կամ էլ գրանցում են իրենց անունով։ Սակայն այսօր վանքերն ու եկեղեցիներն իրենց տերերին վերադարձնել ցանկացողներ էլ կան։ Էվին ընտանիքը դրանցից մեկն է, գրում է Hye Tert-ը։
«Մենք չենք ցանկանում, որ այս վանքը վերանա։ Վերանորոգելու համար էլ միջոցներ չունենք։ Սա աշխարհի պատմության մի մասն է։ Ես այստեղից կոչ եմ անում բոլոր հայերին, ասորիներին և այլ ժողովուրդների, հատկապես Սուրբ Հակոբ վանքի պատմական տերերին. աշխարհի որ անկյունում էլ լինեք, եկեք, և այս վանքը ես կնվիրաբերեմ։ Սա նրանց պապերինն է։ Այստեղ նրանց պատմությունն է քնած…»,-ասել է ընտանիքի անդամը։
Ընտանիքին է պատկանում վանքի սեփականության իրավունքը։ Ենթադրվում է, որ եկեղեցին ասորական է՝ կառուցված 9-12-րդ դարերում։
Վանքի պատմությունը գրված է դրա մոտակայքում գտնվող 10 տոննա կշռող քարի վրա։
«Այս շրջանում 7 եկեղեցի կա։ Այստեղի բոլոր եկեղեցիներն այս վանքի հետ են կապված եղել։ Տատիկս պատմում էր, որ այստեղ առաջ քաղաք է եղել, շուկա, և պատմում էր, թե ինչպես են այստեղից առևտուր արել»,-ասել է Էվին ընտանիքի անդամը։
Նա պատմել է, որ իրենք վանքը պահպանելու համար արել են հնարավորը և պայքարել են նաև գանձեր որոնողների դեմ, որոնք ցանկացել են ավերել եկեղեցին:
Leave a Reply