Դինքի սպանության գործով դատախազը փոխվել է

Թուրքիայում փոխել են «Ակօսի» խմբագրապետ Հրանտ Դինքի սպանության գործով նոր դատավարության դատախազին։ Դինքի սպանության գործով նոր դատախազ է նշանակվել Մուրաթ Ինամը, ով փոխարինել է Մուամմեր Աքքաշին։ Մուրաթ Ինամը միևնույն ժամանակ լինելու է «Էրգենեքոն» ահաբեկչական խմբավորման գործով դատախազը։

Դինքի սպանության գործով նոր դատավարություն իրականացնելու որոշում էր կայացրել Թուրքիայի վճռաբեկ 9-րդ դատարանը 2013 թվականին։ Գործը քննում է Ստամբուլի ծանր հանցագործությունների գծով 14-րդ դատարանը։

Նոր դատավարության ժամանակ քննվում է «հանցավոր խմբավորման» կողմից Դինքի սպանության իրականացման հնարավորությունը։
2012 թվականին Դինքի սպանության գործով դատարանը որոշում էր կայացրել, թե սպանությունը չի իրականացվել «հանցավոր խմբավորման» կողմից։

Սակայն նոր դատավարության ժամանակ քննվում է ոչ թե «ահաբեկչական խմբավորման», այլ «հանցավոր խմբավորման» կողմից սպանություն իրականացնելու հնարավորությունը։

Դինքի փաստաբանները բազմիցս նշել են, որ սպանությունը պետք է դիտարկվի որպես «ահաբեկչական խմբավորման կողմից կատարված»։

Դինք ընտանիքի անդամներն ու փաստաբանները հրաժարվել են մասնակցել դատական նիստերին՝ դժգոհ լինելով դրանից։

«Ակօս» շաբաթաթերթի նախկին խմբագրապետ, հասարակական գործիչ Հրանտ Դինքը սպանվել է 2007 թվականի հունվարի 19-ին Ստամբուլում։ 5 տարի ընթացող կողմնակալ և բազմաթիվ քննադատությունների արժանացած դատավարությունից հետո` 2012 թվականի հունվարի 17-ին, հրապարակվեց դատավճիռը։

Սպանությունն իրականացրած Օգյուն Սամասթը, որի գործը քննում էր Անչափահասների գործերով դատարանը, դատապարտվեց 21 տարի 6 ամիս ազատազրկման։ Դինքի սպանությանը մասնակիցներից Յասին Հայալը դատապարտեց ցմահ ազատազրկման։ Սպանության կազմակերպիչներից Էրհան Թունջելը Դինքի սպանության առաջին գործով անմեղ է ճանաչվել, սակայն երկրորդ գործով կալանավորված է։

AllTurkey.am