Թուրքիայի հայկական համայնքին է վերադարձվել Ստամբուլի Սուրբ փրկիչ հիվանդանոցի հիմնադրամին պատկանող 49.259 քմ հողատարածքը, որի վրա այժմ գործում են մարզական հաստատություններ, շուկա և ավտոկայանատեղի: Ինչպես հայտնում է Ստամբուլում հրապարակվող երկլեզու «Ակօս» շաբաթաթերթը: Թուրքիայի կառավարության հիմնադրամների գլխավոր խորհրդի ընդունած որոշումից հետո նշյալ անշարժ գույքը գրանցվել է հայապատկան տարածք և տրվել` սեփականության համապատասխան վկայականով:
Սուրբ փրկիչ հիվանդանոցի հիմնադրամի գործադիր խորհրդի նախագահ Պետրոս Շիրինօղլուն համայնքի անունից գոհունակություն է հայտնել, որ օրինականորեն տիրոջն է վերադարձվել է հայապատկան անշարժ գույքը:
«Տարիների մեր պայքարը և երազանքը վերջապես դարձավ իրականություն: Այս ձեռքբերումը կարևոր է այն առումով, որ համայնքի ու հիմնադրամի վաղվա օրվան ավելի վստահ կարողանանք նայել»,- ասել է Շիրինօղլուն` շնորհակալություն հայտնելով թուրքական կառավարությանն ու մասնավորապես վարչապետ Ռեջեփ Թայիփ Էրդողանին:
Նշենք, որ վերադարձված այդ տարածքը նախկինում` 1974-ին, խլվել էր հայերից ու հանձնվել Ստամբուլի Զեյթինբուրնու և Բույուքշեհիր թաղապետարանների ենթակայությանը:
Թուրքական «Դեմոքրաթ հաբեր» լրատվական կայքը նշյալ իրադարձությունը բնորոշել է հետևյալ կերպ. «Հայկական համայնքին է վերադարձվել ամենաթանկ անշարժ գույքը Հանրապետական Թուրքիայի ողջ պատմության ընթացքում»:
Leave a Reply