Թուրք գրողի ամեն նախադասությունից այլատյացության հոտ է գալիս

Թուրքական Aykiridogrular կայքի լրագրող Ջևաթ Սինեթը հոդված է հրապարակել, որում քննադատել է թուրք գրող Այշե Քուլինին. նա ժխտում է Հայոց ցեղասպանությունը և փորձում արդարացնել տեղի ունեցածը: Հոդվածը թարգմանաբար ներկայացված է ստորև:

Էնվեր Այսևերի` CNN Turk-ի եթերում ընթացող «Հակասական հարցեր» հաղորդման ժամանակ Քուլինը հայտարարեց. «Այնպես չէ, որ հրեաների պես նրանք ոչինչ չէին անում, ու մենք սկսեցինք կոտորել հայերին»: Անհրաժեշտ է հարց տալ իրեն գրող համարող Այշե Քուլինին, որի յուրաքանչյուր նախադասությունից այլատյացության հոտ է գալիս, թե ի՞նչ  է նշանակում կոտորել,  ինչո՞ւ կոտորեցիք և ի՞նչ էին արել հայերը»: Եթե հայերից ինչ-որ մեկը որևէ բան էլ արած լիներ, դա դարձյալ չի արդարացնում տեղահանությունն ու ցեղասպանությունը:

Մեկ անգամ էլ հարցնենք տիկին Այշեին, թե ըստ իրեն՝ ի՞նչ պիտի անի որևէ ժողովուրդ, որպեսզի ցեղասպանության չենթարկվի և չտեղահանվի: Իրեն օսմանցի թուրք համարող, կայսերական տան ներկայացուցչի պես պահող ու «մի թուրքը մի աշխարհ արժե» տրամաբանությամբ առաջնորդվող Այշե Քուլինին թվում է՝ հզոր է այնքան, որ կղեկավարի ամբողջ աշխարհը:

Լավ, այդ ժամանակ ի՞նչ եղան հայերը, ինչո՞ւ վերացան:  Իրեն օսմանցի համարող Այշե Քուլինը իրեն պատասխանատու չի համարում ցեղասպանության և տեղահանության համար, իսկ ի՞նչի համար է նա պատասխանատու: Քուլինի բոլոր ասածներն անհեթեթություն են:

Հանգիստ թողնելով հայ ժողովրդին՝ ասենք, որ ոչ մի ժողովուրդ ցեղասպանության ու տեղահանության ենթարկվելու արժանի չէ: Ոչ ոք չի կարող արդարացնել նման մեղքը: Եթե ուրիշ մեկը ասեր այս խոսքերը, կհասկանայի, կասեի՝ անկիրթ մարդ է, կասեի՝ չի հասկանում: Սակայն ոչինչ ավելի սարսափելի չի կարող լինել, քան այն, որ գրողն ասի «լավ եղավ, նրանցից էլ ազատվեցինք, ցեղասպանությանն արժանի էին»:

Իրեն մարդ համարող յուրաքանչյուր ոք Այշե Քուլինին մեկ անգամ էլ պիտի հարցնի. «Տիկին Այշե, ինչո՞ւ հայերը ցեղասպանության ու տեղահանության ենթարկվեցին, ինչո՞ւ դա արեցիք, ո՞ր ժողովուրդներն են ցեղասպանության և տեղահանության արժանի, որո՞նք՝ ոչ: Այշե Քուլինն էլ թող տա այս հարցերի պատասխանը: Ասորիներն արժանի՞ էին, եզդիներն արժանի՞ էին, հույներն արժանի՞ էին, որ ժողովուրդներն են արժանի, որոնք՝ ոչ, և ի՞նչ չափանիշներ կան: Որո՞նք են ցեղասպանության և տեղահանության ենթարկվելու չափորոշիչները: Դուք խելագարված պիտի լինեք, հակառակ դեպքում՝ ոչ մի նորմալ մարդ այդպիսի բան չէր ասի, չէր ասի, թե արժանի էին ցեղասպանության ու տեղահանության: Նրանց մեջ կին կա, երեխա կա, ծերունի կա, երիտասարդներ, հարսներ ու փեսաներ կան: Մի՞թե միայն նրա համար, տիկին Այշե, որ նրանք չէին պատկանում իսլամական կրոնին:

http://civilnet.am/2014/02/06/aykiridogrular-site-journalist-ayse-kulin-armenian-genocide