Ֆրանսիայում իշխող Սոցիալիստական կուսակցության՝ Փարիզի քաղաքապետի թեկնածու Անն Իդալգոն հայտարարել է, որ Թուրքիան Եվրոպական միությանը կկարողանա անդամակցել միայն Հայոց ցեղասպանությունը ճանաչելուց հետո։
Ինչպես տեղեկացնում է թուրքական haber3 կայքը՝ «Ջիհան» գործակալությանը հղումով, թեկնածուի խոսքով՝ Թուրքիան Հայոց ցեղասպանության մեջ իր դերակատարումը ճանաչելով՝ ավելի է մեծանալու։ «Դա ինձ համար մի նախապայման է, առանց որի Թուրքիան ԵՄ-ին անդամակցել չի կարող»,-ասել է նա։
Քաղաքապետի թեկնածուն նաև հիշեցրել է, որ ինքը կողմ է Ցեղասպանության ժխտումը քրեականացնող օրինագծին, և նախագահ Ֆրանսուա Օլանդը խոստացել է ընդունել մի օրինագիծ, որը «չի մերժվի Սահմանադրական խորհրդի կողմից»։
«Դրամատիկ և ողբերգական պատմությունը հերքելը թույլ չի տա նոր ինչ-որ բաներ կառուցել»,-ասել է Իդալգոն։
Նա նշել է, որ քաղաքապետի պաշտոնում ընտրվելու դեպքում ամեն տարի ապրիլի 24-ին տեղի ունեցող հիշատակի արարողությունները, որոնց 2001թ-ից ի վեր մասնակցում է նաև ինքը, շարունակական են լինելու։ Իսկ 2015թ.՝ Ցեղասպանության 100-ամյակի կապակցությամբ տեղի ունենալիք միջոցառումներին Փարիզի քաղաքապետարանը ֆինանսական օգնություն է տրամադրելու։
Leave a Reply