Դիարբեքիրի գործող հայկական եկեղեցու համար հոգեւոր սպասավոր չեն գտնում

Մերձավոր Արեւելքի ամենամեծ եկեղեցիներից մեկի՝ Դիարբեքիրի հայկական Սուրբ Կիրակոս եկեղեցում հոգեւոր սպասավորի բացակայությունն անհանգստացնում է եկեղեցու խորհրդի անդամներին։

Թուրքական  Anadolu գործակալության հետ զրույցում Դիարբեքիրի հայկական Սուրբ Կիրակոս եկեղեցու խորհրդի անդամ Գաֆուր Թուրքայը նշել է, թե 2011-ին վերաբացված Սուրբ Կիրակոս եկեղեցում մինչեւ հիմա հոգեւորական չի նշանակվել։ Նա շեշտել է, թե դիմել են Պոլսո հայոց պատրիարքարան, սակայն այնտեղից պատասխանել են, թե այս պահին մշտական ծառայության հոգեւորական չեն կարող ուղարկել։ Թուրքայը հոգեւորականների պակասը բացատրել է Թուրքիայում կրոնական դպրոցի բացակայությունով՝ նշելով, որ Թուրքիայում հոգեւոր ծառայություն իրականացնող քրիստոնյաները կրթություն են ստանում հիմնականում Երուսաղեմում։

«Միայն հատուկ տոներին են Ստամբուլից հայ հոգեւորականներ գալիս։ Պատրիարքարանը խոստացել է, որ ամեն ինչ կանի Դիարբեքիրի Սուրբ Կիրակոս եկեղեցում մշտական ծառայության համար հոգեւորական գործուղել»,-ասել է Գաֆուր Թուրքայը։

Նշենք, որ Մերձավոր Արեւելքի ամենամեծ եկեղեցիներից մեկի՝ Սուրբ Կիրակոսի վերաբացումն ու օծումը տեղի է ունեցել 2011- հոկտեմբերի 22-ին, իսկ առաջին պատարագը մեկ օր անց՝ հոկտեմբերի 23-ին:

Սուրբ Կիրակոսի վերանորոգումը իրականացվել է դիարբեքիրցի հայերի եւ Դիարբեքիրի քաղաքապետարանի աջակցությամբ:

Սուրբ Կիրակոսը վերաբացվել է որպես գործող եկեղեցի:

http://news.am/arm/news/191978.html