Գյուլը դարձյալ կոչ է արել պատմությունը թողնել պատմաբաններին և հայտարարել է երկրի արխիվները բացելու մասին

Թուրքիան պատմաբանների համար բացել է բոլոր արխիվները. Ֆրանսիայի նախագահ Ֆրանսուա Օլանդի հետ հանդիպման ընթացքում հայտարարել է Թուրքիայի նախագահ Աբդուլլահ Գյուլը՝ դարձյալ կոչ անելով «պատմությունը թողնել պատմաբաններին»։

Ինչպես տեղեկացնում է TRT Haber կայքը, Գյուլը հայտարարել է, թե ճիշտ չէ այդ ցավը փոխանցել սերունդներին։ «Այն, ինչ անհրաժեշտ է անել, պատմությունը պատմաբաններին թողնելն է։ Մենք պատրաստ ենք եղել բացել մեր բոլոր արխիվները և բացել ենք։ Թուրքական օրենքներում որոշակի խոչընդոտներ կային որոշ հարցեր քննարկելու համար, սակայն մենք փոխեցինք օրենսդրությունը։ Այժմ ամեն ինչ կարելի է քննարկել»,- ասել է նա։

Օլանդն իր հերթին նշել է, որ այժմ անցյալի իրադարձությունների ուսումնասիրություն է տեղի ունենում։ «Կանենք հնարավորը, որպեսզի հանրությունը ճիշտ տեղեկացված լինի»,- ասել է նա։

Ի դեպ, Ֆրանսուա Օլանդի այցը Թուրքիա առաջինն էր՝ վերջին 22 տարիների ընթացքում։

Ֆրանսիայի նախագահը Թուրքիա կատարած այցի ժամանակ հայտարարել է, որ Ֆրանսիան կընդունի Հայոց ցեղասպանությունը ժխտելու համար քրեական պատասխանատվության ենթարկելու մասին օրենքը: 

http://www.tert.am/am/news/2014/01/28/gul-history/