Կարսի «հայ-թուրքական բարեկամության հուշարձանի» գործով դատը շարունակվում է

Թուրքիայում շարունակվում է Կարսում կառուցված, ապա ոչնչացված հայ–թուրքական բարեկամությանը նվիրված հուշարձանի գործով դատը, որը Թուրքիայի վարչապետ Թայիփ Էրդողանի դեմ բացել էր հուշարձանի հեղինակ Մեհմեթ Աքսոյը։

Էրդողանը 2010 թվականին, այցելելով Կարս, «Մարդկության հուշարձանն» անվանել էր «այլանդակ», որից հետո տեղական իշխանություններն ապամոնտաժել էին այն։ Արձանի քանդումը մեծ աղմուկ էր բարձրացրել, քանի որ շատ էին խոսակցությունները, թե այն նվիրված է եղել հայ-թուրքական հարաբերություններին, ինչի համար էլ Էրդողանը հրահանգել է վերացնել այն։

Թուրքական իշխանությունների այս որոշումից դժգոհ էր մնացել նաև հուշարձանի հեղինակ Աքսոյը, ով էլ Էրդողանի դեմ հայց էր ներկայացրել դատարան՝ փոխհատուցում պահանջելով նրանից։ Սակայն հերթական դատական նիստը հետաձգվել է, քանի որ Թուրքիայի լեզվագիտական խորհուրդը չի կարողանում դատարան ներկայացնել «այլանդակ» (թուրքերեն՝ ucube) բառի հստակ բացատրությունը, ինչն անհրաժեշտ է, որպեսզի դատարանը որոշի դրա վիրավորական լինելու աստիճանը։

AllTurkey.am