Ի՞նչ է խոսել թուրքագետը Հայաստան այցելած թուրք ազգայնամոլի հետ. Հակոբ Չաքրյանը հանդիպումից մանրամասներ է պատմում

Թուրքագետ Հակոբ Չաքրյանը  Tert.am-ին մանրամասներ հայտնեց թուրք պրոֆեսոր Հաքան Օքթայի հետ հանդիպումից, ով ըստ «Թուրքագիտական պորտալի», հայտնի է իր ազգայնական հայացքներով։ Հակոբ Չաքրյանը նշեց, թե հանդիպմանը խոսել են նրա՝ Հայաստանում գրասենյակ բացելու մտադրությունների մասին, անդրադարձել Լեռնային Ղարաբաղի հակամարտության հարցին, ապա ավելացրեց, որ ինքը տեղյակ է եղել, որ թուրք պրոֆեսորը ազգայնամոլ «Գորշ գայլեր» կազմակերպության անդամ է։
«Ինքը ցանկացավ հանդիպել ինձ հետ, դե քանի որ Հայաստան էր եկել, հետաքրքրություն ունի, ես էլ համաձայնվեցի հանդիպել։ Իհարկե, ես թուրքից վախենալու ոչ մի պատճառ չունեմ։ Ինքը ասել էր, որ ինքն առաջին անգամ չէ Հայաստանում, որ ազգայնական շարժում կուսակցության՝ Պանթյուրքիզմը հիմնադրած կուսակցության անդամ է և որը հանդիսանում է «Գորշ գայլեր»–ի քաղաքական կազմակերպությունը»,-ասաց նա։
Նշենք, որ «Թուրքագիտական պորտալը» ներկայացրել է Հաքան Օքթայի Facebook-ում հրապարակած լուսանկարները, ինչից պարզ է դարձել, որ նա հանդիպում է ունեցել ոչ միայն թուրքագետների, քաղաքագետների, այլ նաև Ամենայն Հայոց կաթողիկոս Ն.Ս.Օ.Տ.Տ Գարեգին Երկրորդի և ՀՀ վարչապետ Տիգրան Սարգսյանի հետ։
Հաքան Օքթան ֆեյսբուքյան իր էջով լուսանկարներ է տարածել, որտեղ նա պատկերված է Հայաստանի տարբեր շրջաններում՝ ձեռքով ցույց տալով թուրքական ազգայնամոլական «Գորշ գայլեր» կազմակերպության նշանը։

Ի պատասխան հարցին, թե Հաքան Օքթանի հետ թե ինչի՞ց են խոսել, թուրքագետը նշեց. «Ինձ հետ ի՞նչ պետք է խոսեր՝ օդից ու ջրից էր խոսում, հո ինձ հետ իր ծրագրերն ու հանդիպումները չէ՞ր քննարկելու։ Ինչի համար նա եկել էր՝ հավանաբար կտեղեկացնի իրենց գաղտնի ծառայություններին,-ասաց նա և ապա մի քանի մանրամասներ հայտնեց,–դե ինչ-որ բաներ էր հարցնում, ասաց, որ ինքը Կովկասի ռազմավարական հետազոտությունների կենտրոնի տնօրենն է, որը մի քանի տարի է, ինչ բացվել է։ Մեկ էլ ասաց, որ ուզում է այստեղ նույն կենտրոնի գրասենյակը բացել։ Խոսակցության թեմա է բացվել Ղարաբաղյան խնդրի շուրջ և այդ հարցի կարգավորմամբ էր հետաքրքրվում, թե, ըստ ինձ, երբ կկարգավորվի։ Ասացի՝ եռանախագահող երկրների դիտանկյունում է, դրանց շրջանակներում պետք է խնդիրը լուծվի, և որ եռանախագահները չեն թողնի, որպեսզի Թուրքիան այդ հարցին խառնվի»։ 

Հակոբ Չաքրյանն այսօր արդեն վստահ է, որ նա ինքնանպատակ չէր եկել և տեղեկանալով, որ հանդիպել է նաև վեհափառի և վարչապետի հետ՝ դա արդեն լուրջ համարեց։

«Ինչպե՞ս, նաև վարչապետի հե՞տ է հանդիպել…Կաթողիկոսն է՞լ է ընդունել դրան։ Ես չգիտեմ, իմ և Ռիչարդ Կիրակոսյանի հետ հանդիպումը խնդիր չի, բայց որ Կաթողիկոսի և վարչապետի հետ է հանդիպում, դա արդեն խնդիր է»,- ասաց նա և նշեց, թե ինքը պատճառ չի տեսել, որ հանդիպումից հետո դիմեր Ազգային անվտանգությանը։

«Ես ո՞նց դիմեմ, մարդը նոր չի գալիս, նա շուտ-շուտ է գալիս, Հայաստանից մի քանի հատ էլ աշխատող ունի Անկարայում, այստեղից վերցրել տարել է, այսինքն՝ ԱԱԾ-ն իմ հույսին հավանաբար չի մնացել, լուրջ կազմակերպություն է։ Ենթադրենք ես մերժեի այդ մարդուն, լուրջ չէր լինի, չէ։ Բայց չեմ կասկածում, որ թուրքական կազմակերպության ծառայությունների հրահանգով է գալիս»,- եզրափակեց նա։

Հանդիպումից մանրամասներ փորձեցինք խնդրել Մայր Աթոռի տեղեկատվական համակարգի պատասխանատու Տեր Վահրամ քահանա Մելիքյանից, ով տեղյակ չէր այս հարցից և խնդրեց ծանոթանալուց հետո պարզաբանում տալ։ Ավելի ուշ Տեր Վահրամ քահան Մելիքյաննը պարզաբանեց, թե Վեհափառ հայրապետը լուսանկարի անձնավորությանը չի ճանաչում և հավանաբար նա այն հազարավոր մարդկանցից է, ովքեր մոտենում է Վեհափառին և խնդրում լուսանկարվել նրա հետ և օրհնություն ստանալ։
«Մայր Աթոռ սուրբ Էջմիածին մշտապես այցելում են և հայ ուխտավորներ, ինչպես Հայաստանի շրջանից, այնպես էլ սփյուռքից, ինչպես նաև բազում օտար հյուրեր, որոնք այցելում են Հայաստանի Հանրապետություն։ Եվ այդ իմաստով միշտ Մայր տաճարի շրջակայքում Վեհափառ հայրապետին հանդիպելիս՝ մարդիկ ցանկանում են լուսանկարվել Հայրապետի հետ, ինչին որ Վեհափառը երբեք չի մերժում և իր օրհնություն է շատ դեպքերում բաշխում հայ ուխտավորներին։ Հնարավոր է, որ նման խնդրանքով Վեհափառին մոտեցել են նաև օտարներ և այս անձը, որը լուսանկարվել է Վեհափառ հայրապետի հետ»,-ասաց վեհափառի մամլո դիվանը։
Հարցին, թե այսինքն՝ լուսանկարի անձի հետ կաթողիկոսն առանձին հանդիպում չի ունեցել, Տեր Վահրամ քահանա Մելիքյանը պատասխանեց. «Ո՛չ, Վեհափառ հայրապետն այդ անձին չի ճանաչում»։
ՀՀ վարչապետի խոսնակ Հարություն Բերբերյանը նույնպես չպատասխանեց մեր հեռախոսազանգերին։

http://www.tert.am/am/news/2014/01/22/turk/