Էրդողանը փրկեց իր որդուն

Թուրքիայի վարչապետ Ռեջեփ Թայիփ Էրդողանի որդին՝ Բիլալ Էրդողանը, փրկվեց. նրան այլևս չեն հետապնդում, գրում է թուրքական Radikal-ը:

Ըստ թերթի տեղեկությունների՝ «Մեծ կաշառք» օպերացիայի շրջանակում նախարարների որդիների ձերբակալությունից հետո նախատեսվում էր  բերման ենթարկել ու ձերբակալել Թուրքիայի՝ գերազանցապես բիզնես ոլորտում ներգրավված 45 ազդեցիկ այլ ներկայացուցիչների, այդ թվում՝ Էրդողանի որդուն:

Մինչդեռ աղմկահարույց ձերբակալություններից անմիջապես հետո Էրդողանը  սկսեց զտումներ անել և աշխատանքից ազատեց օպերացիան իրականացրած դատախազներին: Նորանշանակ դատախազները չեղյալ են հայտարարել Բիլալ Էրդողանին և մյուսներին բերման ենթարկելու ու ձերբակալելու վճիռը: Որոշվել է սահմանափակվել նրանց զուտ դատախազություն հրավիրելով, հաղորդում է Radikal-ը:

Այս հարցին անդրադարձել է Թուրքիայի արդարադատության նախարար Բեքիր Բոզդաղը, որը պատասխանելով մեջլիսի պատգամավորների բարձրացրած հարցերին՝ նշել է, որ մամուլում տեղ գտած լուրերը «չեն համապատասխանում իրականությանը»: Ըստ Hurriyet-ի՝ Բոզդաղն ասել է նաև, որ Բիլալի մասին նման լուրեր տարածողները նպատակ ունեն թուլացնել Էրդողանին ու նրա կառավարությանը:

Մամուլում տեղեկություններ են շրջանառվել, թե Բիլալը հեռացել է Թուրքիայից և նրան տեսել են Բաթումում, որից հետո նա մեկնել է Ադրբեջան և ապաստանել Qafqaz City հյուրանոցում: Թուրքական թերթերի հաղորդմամբ՝ Qafqaz City-ից հաստատել են, որ Բիլալ Էրդողանը եղել է իրենց հյուրանոցում:

http://civilnet.am/2014/01/17/tayip-erdogan-saved-son-bilal-erdogan