Հունվարի 19-ին կլրանա Հրանտ Դինքի մահվան 7-րդ տարելիցը: Այս տարի ևս Դինքի հարազատները, ընկերները, թուրքական հասարակության տարբեր շերտերի ներկայացուցիչներ կհավաքվեն Թաքսիմի հրապարակում՝ այնտեղից քայլերթ սկսելով դեպի «Ակօս»-ի խմբագրատուն:
Այս տարի Հրանտ Դինքի հիշատակին նվիրված մի շարք միջոցառումներ են կազմակերպվել: Մասնավորապես հունվարի 17-ին Ստամբուլի Բողազիչի համալսարանում տեղի կունենա «Հրանտ Դինք. մարդու իրավունքներ և խոսքի ազատություն» թեմայով կոնֆերանս, որը կազմակերպվել է քաղաքագիտության և միջազգային հարաբերությունների, սոցիոլոգիայի և պատմության ֆակուլտետների համատեղ ջանքերով: Որպես բանախոսներ հանդես կգան Կալիֆոռնիայի համալսարանից, Փարիզում գտնվող Եվրոպական սոցիոլոգիայի կենտրոնից հրավիրված մասնագետներ:
Հունվարի 18-ին Դինքին կհիշեն ծննդավայրում՝ Մալաթիայում: Քայլերթ կկազմակերպվի դեպի Դինքի հայրենի տուն: Տեղի կունենա Դինքի սպանության, դատավարության ընթացքի մասին պատմող «Հունվարի 19-ից հունվարի 19-ը» և «Ծիծեռնակի բույնը» ֆիլմերի ցուցադրությունը, ներկաների հետ զրույց կվարի Դինքի ընտանիքի փաստաբաններից Հաքան Բաքըրջըօղլուն:
Հունվարի 19-ին՝ Հրանտ Դինքի սպանության օրը, Ստամբուլի Գեդիկփաշա թաղամասում տեղակայված Սուրբ Հովհաննես հայկական եկեղեցում կիրակնօրյա պատարագից հետո Դինքի հիշատակին նվիրված ոգեկոչման արարողություն կանցկացվի Բալըքլը հայկական գերեզմանատանը: Դինքին կհիշեն նաև մի քանի այլ հասարակական կազմակերպությունների կողմից նախապատրաստվող միջոցառումների ժամանակ:
Ankakh.com
Leave a Reply