Թուրքիայի փոխվարչապետ Բեշիր Աթալայը Անկարայում դեսպանների հետ հանդիպմանը հայտարարել է, թե Օջալանը քրդերի առաջնորդն է, եւ նրա հետ բանակցությունները շարունակվելու են։
Թուրքական OdaTV կայքի փոխանցմամբ՝ Թուրքիայի փոխվարչապետը Անկարայում դեսպանների հետ փակ հանդիպմանը սկանդալային հայտարարություն է արել Թուրքիայում ահաբեկիչների պարագլուխ համարվող եւ բազմաթիվ սպանությունների եւ պայթյունների կազմակերպման համար ցմահ դատապարտված Աբդուլլահ Օջալանի մասին։
Թուրքիայի փոխվարչապետն ասել է, թե քրդական հարցի կարգավորման շրջանակներում շարունակվում են բանակցություններն Աբդուլլահ Օջալանի հետ։ «Հավանեք կամ չհավանեք՝ Աբդուլլահ Օջալանը քրդերի առաջնորդն է։ Ազգային հետախուզության ծառայությունը (MIT) նրա հետ բանակցում է։ Մենք էլ բանակցում ենք քրդական Խաղաղություն եւ ժողովրդավարություն (BDP) կուսակցության պատգամավորների հետ։ Նրանք էլ իրենց հերթին խորհրդակցում են Օջալանի հետ»,-ասել է Բեշիր Աթալայը։
Նշենք, որ թուրքական կայքերը հայտարարությունը սկանդալային են համարել, քանի որ մինչ այս իշխանությունների ներկայացուցիչները Օջալանին քրդերի առաջնորդ չեն համարել՝ նրան մշտապես անվանելով ահաբեկչական կառույցի ղեկավար եւ պնդել, թե ահաբեկչի հետ բանակցությունները բացառվում են։
Leave a Reply