Իմրալը բանտին մէջ բանտարկուած ՔԱԿ–ի ղեկավար Ապտիւլլա Օճալանի հետ հանդիպում ունեցած Թուրքիոյ խորհրդարանի անդամ քիւրտ երեսփոխանները գրաւոր յայտարարութեան մը մէջ հաղորդած են, որ Օճալան ուղերձով մը պիտի դիմէ հայ ժողովուրդին:
Օճալանի խօսքը տեղադրուած է քրտական «Ֆըրաթ» լրատու գործակալութեան կայքէջին վրայ. «Կ՛ողջունեմ հայ ժողովուրդի արժանաւոր զաւակ Հրանդ Տինքի յիշատակն ու պայքարը: Յոյս ունիմ, որ Հրանդ Տինքի սպանութեան օրը ընդարձակ նամակով դիմեմ հայ ժողովուրդին»:
Օճալանի այս քայլը պայմանաւորուած է վերջին օրերուն ՔԱԿ-ի ղեկավարներէն Պեսէ Հոզաթի անհեթեթ յայտարարութեամբ, թէ Թուրքիոյ մէջ կը գործեն կառոյցներ, որոնք «պետութիւն են պետութեան մէջ, այսինքն` զուգահեռ պետութիւն են»: Հոզաթը իբրեւ այդպիսի խորքային ուժ նշած է Ֆեթհուլլահ Կիւլենի գլխաւորած Կիւլենական իսլամական շարժումը եւ հայկական, հրէական ու յունական լոպիները:
Պեսէ Հոզաթի այս յայտարարութենէն ետք բոլորին հայեացքները ուղղուեցան Իմրալըի մէջ բանտարկուած Ապտիւլլա Օճալանին. 2013-ի մարտին թրքական մամուլ թափանցած էր Օճալանի եւ քիւրտ գործիչներու միջեւ հանդիպումին սղագրութիւնը, որուն մէջ ՔԱԿ-ի ղեկավարը հանդէս եկած էր համանման յայտարարութեամբ: Օճալան ըսած էր, որ «հայկական, յունական եւ հրէական լոպիները պետութիւն են պետութեան մէջ»: Ըստ անոր, այս ուժերը լոպիական գործունէութիւն ծաւալող սովորական կազմակերպութիւններ չեն: Ան ուշադրութիւն հրաւիրած էր այն հանգամանքին վրայ, որ երեքն ալ Թուրքիոյ արեւելքէն կը սերին:
Ըստ Օճալանի, քեմալական Հանրապետական ժողովուրդի կուսակցութիւնն ու Ազգայնական շարժում կուսակցութիւնը «այդ խորքային կառոյցներու պարզ գործիքներն են»: Ան կը պնդէ, որ խորքային ուժերու նպատակը թուրք-քրտական երկխօսութեան հոլովոյթը ի չիք դարձնելն է:
Leave a Reply