Կապանը կը կանգնեցնի Հայոց Ցեղասպանութեան ճանաչմանը մեծապէս նպաստած անձանց յիշատակի յուշարձան

Հայոց Ցեղասպանութեան 100-րդ տարելիցին ընդառաջ Կապանի աւագանու որոշմամբ Բաղաբուրջի յուշահամալիրում կը կանգնեցւի Հայոց Ցեղասպանութեան ճանաչման գործում ներդրում ունեցած անձանց յիշատակը յաւերժացնող յուշարձան:

Կապանի քաղաքապետին կից քաղաքաշինութեան, ճարտարապետութեան, մշակոյթի խորհրդի հերթական նիստում փակ քւէարկութեամբ որոշւել է, որ ներկայացւած երկու էսքիզային աշխատանքներից պէտք է կառուցւի «Կենաց ծառ» յուշարձանը, որի հեղինակը կապանցի գեղանկարիչ, քանդակագործ Լորիկ Մինասեանն է: Նիստին ներկայ խորհրդի 12 անդամներից 10-ը քւէարկել է այդ նախագծի օգտին:
Յուշարձանը կը լինի տուֆից կամ բազալտից, կունենայ 4,5 մետր բարձրութիւն: Յուշարձանի հիմքում յաւերժութիւնը խորհրդանշող կենաց ծառն է, որի վերեւում կը լինի նուռ:
«Ճեղքւած նուռը եւ նրանից վայր ընկնող հատիկները մեզ յիշեցնում են այն հերոսներին, ովքեր յանուն հայրենեաց չխնայեցին իրենց երիտասարդ կեանքը: Իսկ աղաւնիները խորհրդանշում են, որ ցեղասպանութեան ճանաչման գործում հայ ժողովուրդն ընտրել է խաղաղ ճանապարհը: Յուշարձանը կը նւիրւի Հայոց Ցեղասպանութեան ճանաչմանը նպաստած մարդկանց՝ Ֆրիտեօֆ Նանսէնի, Հրանտ Դինքի, Սողոմոն Թեհլիրեանի ու շատերի յիշատակին»,- ասաց յուշարձանի հեղինակը:
Նիստում քննարկւեց նաեւ «Հին Կապան՝ Սիւնիքի թագաւորութեան մայրաքաղաք 970-1170 թթ.» յուշամեդալ ունենալու հարցը, որի խնդրանքով քաղաքապետին էր դիմել կապանցի ազգագրագէտ Ռոբերտ Էջանանցին: Ներկայացւած առաջարկն ընդունւեց խորհրդի կողմից: Մեդալի արտաքին տեսքի մշակման աշխատանքներով կը զբաղւեն խորհրդի անդամները:

Alikonline.ir