«Ակօս» թերթի խմբագրապետ Հրանտ Դինքի գործով 2014թ. հունվարի 7-ին վերսկսված դատավարության ընթացքում Հրանտի ընկերները դատարանի շենքի առջև բողոքի ցույց են կազմակերպել, հաղորդում է Bianet-ը: «Դինքի ընկերների» անունից հանդես եկած Ահմեթ Ումիթը նշել է, որ Թուրքիայում վերջերս սկսված «Մեծ կաշառք» կոռուպցիոն սկանդալի կիզակետում հայտնվել են նաև պաշտոնյաններ, որոնց անունները կապված է Դինքի սպանության գործի հետ:
Ումիթն ասել է, որ ներքին գործերի նախարար Մուամեր Գյուլերը հրաժարական է տվել, քանի որ որդին ձերբակալվել է կաշառակերության մեղադրանքով, իսկ գյուլենական շարժման դեմ իրականացված գործողությունների արդյունքում ոստիկանության հարյուրավոր աշխատակիցների նման պաշտոնաթող է արվել Անվտանգության վերահսկողության հանձնախմբի ղեկավար Ռամազան Աքյուրեքը:
Մուամեր Գյուլերը Դինքի սպանության ժամանակ եղել է Ստամբուլի ոստիկանապետը, և տեղեկություններ կան այն մասին, որ քայլեր չի ձեռնարկել սպանությունը կանխելու համար: Աքյուրեքն էլ Հրանտ Դինքի սպանության ժամանակ եղել է Տրապիզոնի նահանգի անվտանգության վարչության պետը և աշխատանքից ազատվել պաշտոնական պարտականությունների թերացման համար:
Ումիթը նշել է, թե այժմ շարունակվում է Էրդողանի գլխավորած Արդարություն և զարգացում կուսակցության և գյուլենական շարժման միջև հակամարտությունը, սակայն երբ գործը հասնում է հայի` Դինքի սպանությանը, ապա այս երկու կոմերը ազգային միասնության անվան տակ համախմբվում են:
«Տեղի ունեցած իրադարձությունները վկայում են, որ հային սպանելը պետության համար սովորական բան է, և որ սպանողն անպատիժ է մնալու»,- ասել է Ահմեթ Ումիթը:
Leave a Reply