Հայ-թուրքական պատվիրակությունները քննարկել են սահմանին առնչվող հարցեր

Թուրքիայի ու Հայաստանի սահմանին գտնվող Արփաչայ, Աքյաքա և Դիգոր շրջանների գյուղապետերից ու թուրք սահմանապահներից բաղկացած պատվիրակության և Հայաստանի սահմանապահ մարմինների միջև Գյումրիում հանդիպում է տեղի ունեցել։

Ինչպես տեղեկացնում է թուրքական İhlas գործակալությունը, հանդիպման ընթացքում քննարկվել են սահմանի խախտումներին, դրանց կանխարգելմանը, կենդանիների շրջանում տարածված հիվանդություններին, կենդանիների գողություններին, սահմանաքարերին առնչվող հարցեր։

Հանդիպման ընթացքում ամփոփվել են 2013թ. տեղի ունեցած աշխատանքները, և քննարկվել է 2014թ. իրականացվելիք աշխատանքների օրակարգը։

Հանդիպումների շրջանակներում թուրքական կողմը հիշեցրել է 2013թ. հուլիսի 31-ին սահմանը հատած և սպանված թուրք հովվի մասին և նշել, որ հարցը շարունակելու են բարձրաձայնել միջազգային ասպարեզում։

Համաձայնություն է ձեռք բերվել հաջորդ հանդիպումը 2014թ. մարտին անցկացնելու վերաբերյալ։

http://www.tert.am/am/news/2014/01/09/arm-turkey/