Թուրքիայում առաջացած կառավարական ճգնաժամը գնալով ավելի է խորանում: Կոռուպցիոն սկանդալի մեջ ներգրավված մի շարք նախարարներ հեռացվեցին պաշտոնից: Այնուհետև կասկածի տակ հայտնվեց վարչապետ Էրդողանի որդին՝ Բիլալ Էրդողանը: Արդյո՞ք նա գաղտնի հանդիպումներ է ունեցել Սաուդյան Արաբիայից գործարար Յասին ալ Քադիի հետ: Ինչն՞ է կապում Էրդողանի կլանին սաուդացի գործարարի հետ, որը, հավանաբար, առնչություն ունի ահաբեկչական Ալ-Քաիդա կազմակերպությանը: Այս բոլոր հարցերի պատասխանները թուրքական խորհրդարանի ընդդիմադիր ուժերը պահանջում են վարչապետ Թայիփ Էրդողանից:
Էրդողանը հերքում է իրեն առաջադրված բոլոր մեղադրանքները: Նա վստահ է, որ ոստիկանությունն ու դատախազությունը մասնակից են իր դեմ ուղղված դավադրությանը, որը «ոգեշնչվում է արտասահմանյան մութ ուժերի կողմից»: Միակ բանը, որ կարող է անել Էրդողանը, մի շարք պաշտոնյաներին հեռացնելն է: Միայն հունվարի 7-ին Ստամբուլում 350 ոստիկան է հեռացվել:
Հարցը սրություն է ստացել այն պատճառով, որ վերոհիշյալ Յասին ալ Քադին մինչև 2012 թ. ընդգրկված էր Ալ-Քաիդայի գործակիցների սև ցուցակում: Սակայն նա անօրինականորեն քանիցս թափանցել է Թուրքիա, ինչի ապացույցներն առկա են: Թուրքական ընդդիմությունը պնդում է, որ Թուրքիայում սաուդ գործարարի հետ բանակցությունները տեղի են ունեցել վարչապետի անվտանգության ծառայության հսկողության ներքո: Թուրքական թերթերը լուսանկարներ են հրապարակել Բիլալ Էրդողանի և ալ Քադիի հանդիպումներից:
Այսպիսով Թուրքիայում ստեղծված իրավիճակը բավական լարված է և 2014 թվականի նախագահական ընտրությունների նախաշեմին կարող է անսպասել շրջադարձի հանգեցնել:
Ankakh.com
Leave a Reply