Թուրքիայում ձերբակալվել է երկու մարդ, ովքեր անցնում են Հրանտ Դինքի սպանության նոր դատական գործով, փոխանցում է CNNTurk-ը։
Հունվարի 7-ին Տրապիզոնում ձերբակալվել է Զեյնել Աբիդին Յավուզը, ում անունը շրջանառվել է Դինքի սպանության ժամանակ։ Եվս մի հոգի՝ Օսման Հայալը, նույնպես ձերբակալվել է։ Օսմանը Յասին Հայալի անունն է, ով Դինքի սպանության առաջին գործով դատապարտվել էր ցմահ ազատազրկման։ Ձերբակալությունները կատարվել են Ստամբուլի դատարանի պահանջով։ Որպես խափանման միջոց է ընտրվել կալանքը։ Այլ մանրամասներ դեռ հայտնի չեն։
Դինքի սպանության գործով նոր դատավարություն իրականացնելու որոշում էր կայացրել Թուրքիայի վճռաբեկ 9-րդ դատարանը։ Գործը քննում է Ստամբուլի ծանր հանցագործությունների գծով 14-րդ դատարանը։
Նոր դատավարության ժամանակ քննվում է «հանցավոր խմբավորման» կողմից Դինքի սպանության իրականացման հնարավորությունը։
2012 թ. Դինքի սպանության գործով դատարանը որոշում էր կայացրել, թե սպանությունը չի իրականացվել «հանցավոր խմբավորման» կողմից։
Սակայն նոր դատավարության ժամանակ քննվում է ոչ թե «ահաբեկչական խմբավորման», այլ «հանցավոր խմբավորման» կողմից սպանության իրականացնելու հնարավորությունը։
Դինքի փաստաբանները բազմիցս նշել են, որ սպանությունը պետք է դիտարկվի որպես «ահաբեկչական խմբավորման կողմից կատարված»։
Դինք ընտանիքի անդամներն ու փաստաբանները հրաժարվել են մասնակցել դատական նիստերին։
«Ակօս» շաբաթաթերթի նախկին խմբագրապետ, հասարակական գործիչ Հրանտ Դինքը սպանվել է 2007 թ. հունվարի 19-ին Ստամբուլում։ 5 տարի ընթացող կողմնակալ և բազմաթիվ քննադատությունների արժանացած դատավարությունից հետո` 2012 թ. հունվարի 17-ին հրապարակվեց դատավճիռը։
Սպանությունն իրականացրած Օգյուն Սամասթը, որի գործը քննում էր Անչափահասների գործերով դատարանը, դատապարտվեց 21 տարի 6 ամիս ազատազրկման։ Դինքի սպանությանը մասնակիցներից Յասին Հայալը դատապարտեց ցմահ ազատազրկման։ Սպանության կազմակերպիչներից Էրհան Թունջելը Դինքի սպանության առաջին գործով անմեղ է ճանաչվել, սակայն երկրորդ գործով կալանավորված է, իսկ նրա վերաբերյալ վճիռը դեռ հայտնի չէ։
AllTurkey.am
Leave a Reply