Դեկտեմբերի 25-ին Անկարայում ԱՄՆ–ի դեսպանությունը հանդես է եկել հայտարարությամբ, որով հերքել է, որ դեսպանության աշխատակիցները հանդիպումներ են ունեցել տեղական հասարակական կազմակերպությունների հետ և թուրքական կառավարության դեմ լոբբինգ իրականացրել, հաղորդում է Hurriyet Daily News-ը:
«Որոշ լրատվամիջոցներում ԱՄՆ-ի դեսպանության աշխատակիցների մասին հայտնված հրապարակումները չեն համապատասխանում իրականությանը: Կրկնում ենք, որ ոչ ոք չպետք է վտանգի տակ դնի Թուրքիայի և ԱՄՆ-ի միջև հարաբերությունները միտումնավոր զրպարտության միջոցով»,- ասված է դեսպանության գրավոր հայտարարության մեջ:
Ավելի վաղ թուրքական Sabah և Yeni Şafak օրաթերթերը մեջբերել էին Անկարայի Երիտասարդ գործարարների միության նախագահ Աբդուլլահ Դեղերին, որն իբր հայտարարել էր, որ ԱՄՆ դեսպանության աշխատակիցներն իրեն ասել էին, որ թուրքական կառավարության դեմ լոբբինգ են նախաձեռնում և խնդրում էին կառույցի աջակցությունը:
Դեսպանության հայտարարությունը հրապարակվել է մի քանի ժամ անց այն բանից հետո, երբ ԱՄՆ Պետքարտուղարության խոսնակ Ջեն Պսակին քննադատել էր հրապարակումներն այն մասին, որ Թուրքիայում ԱՄՆ-ի դեսպանն ու ամերիկացի այլ պաշտոնյաներ ներգրավված են թուրքական կառավարության դեմ գործողություններում:
«Թուրքական մամուլի որոշ ներկայացուցիչների կողմից շարունակական անհիմն մեղադրանքները` Թուրքիայում ԱՄՆ-ի դեսպան Ֆրանսիս Ռիկարդոնեի, ամերիկացի բարձրաստիճան այլ պաշտոնյաների, ամերիկացի քաղաքացիների և խմբերի դեմ, մեծապես մտահոգիչ են»,- դեկտեմբերի 24-ին հայտարարել է Պետքարտուղարության խոսնակ Պսակին:
Թուրք-ամերիկյան հարաբերությունների լարվածությունն ի հայտ է եկել Թուրքիայում վերջին օրերին ստեղծված ներքաղաքական իրադրության ֆոնին՝ պայմանավորված կոռուպցիոն սկանդալով:
Վարչապետ Ռեջեփ Թայիփ Էրդողանը հայտարարել էր, որ «Վաշինգտոնի դեսպանը կարող է վտարվել սադրիչ գործողությունների համար», ինչին ի պատասխան՝ ԱՄՆ-ը լրջորեն նախազգուշացրել էր Թուրքիային, որ իր և իր դիվանագետների դեմ նման «կեղտոտ» արշավի նախաձեռնումը կարող է անդրադառնալ երկկողմ հարաբերությունների վրա:
Թուրքիայում դեկտեմբերի 17-ին ոստիկանության գործողությունների արդյունքում կաշառակերության և խարդախության կասկածանքով թուրք բարձրաստիճան պաշտոնյաների որդիների և հայտնի գործարարների բերման ենթարկումից հետո կառավարամետ մամուլը գրեց, որ ԱՄՆ-ի դեսպան Ֆրանսիս Ռիկարդոնեն ԵՄ մի շարք դեսպանների ասել է. «Կայսրության անկման ականատեսը կլինեք»: Չնայած դեսպանությունը կտրականապես հերքել էր այս տեղեկությունները, Էրդողանը Սամսունում իր ելույթի ժամանակ, անդրադառնալով նման հայտարարություններին, ասել է. «Վերջին օրերին որոշ դեսպաններ ներգրավվել են սադրիչ գործողություններում: Նրանց եմ դիմում Սամսունից. «Ձեր գործով զբաղվե’ք: Պարտավոր չենք ձեզ պահել մեր երկրում»:
Էրդողանի կոշտ ելույթից հետո Ռիկարդոնեն հանդես էր եկել գրավոր հայտարարությամբ, որում մեկ անգամ ևս հերքել էր տարածված տեղեկություններն ու պնդել, որ «ոչ ոք չպետք է վտանգի թուրք-ամերիկյան հարաբերություններն անհիմն պնդումներով»:
Leave a Reply